Búgin Parlament Májilisiniń jalpy otyrysynda QR Ulttyq bank tóraǵasy Daniiar Aqyshev teńgeniń aiyrbas baǵamyna qatysty túsinik berdi, dep habarlaidy QazAqparat.
«Ulttyq bank shekarasy, dálizi nemese basqa da baǵdary joq ózgermeli aiyrbas baǵamy saiasatyn jalǵastyrady. Valiýta baǵamy negizinen elimizdegi tólem balansy jaǵdaiyna bailanysty, iaǵni shetel valiýtasynyń elimizge túsimi men jylystaýynyń teńgerimi áserinen qalyptasatynyna senimdimiz. Bul syrtqy kúizelisterdi azaitýǵa jáne ekonomikamyzdyń básekege qabilettilik kórsetkishterin dereý túzetýge múmkindik beredi», - dep toqtaldy UB basshysy «2019-2021 jyldarǵa arnalǵan respýblikalyq biýdjet týraly» zań jobasyn talqylaý kezinde.
Aldyn ala derekter boiynsha 2018 jyldyń 9 aiynda tólem balansynyń aitarlyqtai jaqsarýy baiqaldy. Ótken jyly 4,6 mlrd dollardy qurǵan aǵymdaǵy shot tapshylyǵy 0,9 milliard dollarǵa nemese 5,4 esege deiin tómendedi.
«2018 jyldyń úshinshi toqsanynda aǵymdaǵy shot tapshylyǵy tek 0,1 mlrd AQSh dollaryn qurady, bul sońǵy jyldarǵy eń jaqsy kórsetkish.
Aldaǵy jyldardaǵy aǵymdaǵy shot tapshylyǵy kóleminiń tómendeý úrdisi kútilýde, bul ulttyq valiýta turaqtylyǵyna jaǵymsyz faktorlardy barynsha azaitýǵa múmkindik beredi. Aiyrbas baǵamy boiynsha qysqa merzimdi táýekelderge toqtalsaq, jahandyq qarjy naryqtaryndaǵy belgisizdik jáne negizgi saýda áriptes elderiniń valiýta baǵamdary jaǵdaiynyń nasharlaýy bolyp qalady», - dedi D. Aqyshev.
Belgili bolǵandai, jyldyń basynan 30 qazanǵa deiin valiýta naryǵynda teńge baǵamy 10,9 paiyzǵa álsiredi jáne bir AQSh dollary úshin 368,55 teńgeni qurdy.
«Bul aiyrbas baǵam saiasaty valiýtalyq rezervterdi saqtaýǵa múmkindik beredi. Qyrkúiektiń sońynda Ulttyq banktiń altyn-valiýta rezervteri 30 mlrd AQSh dollaryn, Ulttyq qordyń aktivteri - 56,3 mlrd AQSh dollaryn qurady. Halyqaralyq rezervterdiń jalpy kólemi 86,3 mlrd AQSh dollaryna jetti», - dedi ol.
Budan buryn habarlanǵandai, bazalyq stavkanyń jańa deńgeii teńge aktivterine suranysty arttyrady.
