QR Tótenshe jaǵailar ministrligi Jambyl oblysy Korolevka kentiniń áskeri qoimasyndaǵy órtti sóndirýge tikushaq usynýǵa daiyn. Bul týraly ministrliktiń baspasóz qyzmeti málim etti, dep habarlaidy "Ult aqparat".
«QR Tótenshe jaǵdailar ministrligi Qorǵanys ministrliginiń resmi suraý salsa, órtti sóndirý úshin tikushaqtar usynýǵa daiyn», - dep jazylǵan resmi málimette.
Ministrliktiń deregi boiynsha, áskeri qoimadaǵy tótenshe oqiǵanyń saldaryn joiýǵa ózge óńirlerden mamandar tartylǵan.
«Almaty qalasynan quramynda 6 tehnika men jeke quramnyń 22 adamy bar jasaq, Túrkistan qalasynan apattyq meditsinalyq ortalyqtyń 1 tehnikasy, Shymkent qalasy tótenshe jaǵdailar departamentiniń 8 tehnika men jeke quramnyń 33 adamy bar jasaq jáne ministrliktiń apattyq meditsina ortalyǵynyń qyzmetkerleri kelip jetti. QR Tótenshe jaǵdailar ministrliginiń kúshteri men quraldary qalǵan órt oshaqtaryn sóndirýge, turǵyndardy turaqty ornalasý ornyna qaitarýǵa jáne temirjol men avtomobil joldaryn qalpyna keltirýge tartylatyn bolady», - dep jazylǵan baspasóz qyzmetiniń málimetinde.
Apat saldaryn joiýǵa ministrlik tarabynan mynadai kúshter jumyldyrylǵan:
- TJM - 153 qyzmetker, 46 tehnika,
- PD - 400 qyzmetker, 54 tehnika,
- №28349 á/b - 8 qyzmetker, 2 tehnika,
- №5513 á/b - 273 áskeri qyzmetshi, 12 tehnika,
- Ulttyq gvardiia - 520 adam jáne 250 adam rezervte.
Aita keteiik, 26 tamyz kúni saǵat 19:00-de Jambyl oblysynyń Baizaq aýdanynda ornalasqan áskeri bólim qoimalarynyń biri órtenip, artynan joiqyn jarylys boldy.
