Orman qoryn kúndelikti patrýldeý jáne tabiǵi órtterdi jedel sóndirý úshin Tótenshe jaǵdailar ministrligi jáne Ekologiia, geologiia jáne tabiǵi resýrstar ministrliginiń aviatsiialyq tehnikasyn ornalastyrý júrgiziledi.
Bul týraly Ortalyq kommýnikatsiialar qyzmetinde ótken brifingide QR TJM Órtke qarsy qyzmet komitetiniń tóraǵasy Nurbolat Derbisov aitty, dep habarlaidy QazAqparat.
«TJM sáýir aiynan bastap ulttyq parkterdiń, tabiǵi qoryqtardyń, sondai-aq balalardy saýyqtyrý lagerleriniń órtke qarsy jaǵdaiy men daiyndyǵyn tekserýde. Shekara mańyndaǵy yntymaqtastyq sheńberinde Reseimen shektes óńirleriniń (Astrahan, Omby, Orynbor – 2, Volgograd, Cheliabi, Novosibirsk, Tiýmen, Qorǵan, Omby oblystary jáne Altai ólkesi) TJM bólimshelerimen birlesip, 9 taktikalyq oqý-jattyǵý josparlandy. Onda negizgi taktikalyq tásilmen qatar transshekaralyq órtterdi joiý kezinde órtten qutqarý qyzmetteriniń memlekettik shekaradan jeńil ótý tártibi pysyqtalatyn bolady», - deidi TJM-nyń Órtke qarsy qyzmet komitetiniń tóraǵasy Nurbolat Derbisov.
Onyń aitýynsha, eldiń ormandy dala alqaptarynda profilaktika sharalaryn júrgizý úshin TJM-men Memlekettik órt baqylaý, Orman sharýashylyǵy mekemeleri jáne jergilikti politsiia qyzmeti ókilderinin turatyn mobildi toptar quryldy.
«Bul toptar 1 sáýirden bastap 805 reid júrgizip, 286 azamatty jaýapqa tartty», - deidi ol.
