videodan alynǵan kadr
Astananyń Tótenshe jaǵdailar departamenti "Han shatyr" saýda úii mańynda salynyp jatqan turǵyn úi kesheninde bolǵan birqatar jarylystyń aldyn ala sebebin atady, - dep habarlaidy Tengrinews.kz.
"23 mamyrda saǵat 16:28-de Astana qalasy Tótenshe jaǵdailar departamentiniń órt sóndirý bólimsheleri Muhamedhanov kóshesindegi jańadan salynǵan nysanda órt shyqqany týraly kelip túsken habarlamaǵa bardy. Órt sóndirýshiler oqiǵa ornyna 6 minýtta jetti.
Úsh gaz ballony jarylǵany anyqtaldy, sondai-aq 15 rýlon shatyr materialy janǵan. Órt sóndirýshiler órtti saǵat 16:45-te aýyzdyqtady. Órtti sóndirýge Astana qalasy Tótenshe jaǵdailar departamenti jeke quramynyń 19 adamy men 4 tehnikasy jumyldyryldy", - dedi TJD ókilderi.
Astana densaýlyq saqtaý basqarmasy oqiǵa saldarynan zardap shekkender joq ekenin rastady.
