Árbir sottalǵan adam úshin koloniiadan bosap shyǵý kópten kútken kún bolyp sanalady. Dese de, tótenshe jaǵdai kezinde olardy túzeý mekemeleriniń aldynan týystary qarsy ala almaidy, dep habarlaidy "Ult aqparat" QR IIM Qylmystyq-atqarý júiesi komitetine silteme jasap.
«Karantin rejimi engizilgeli beri bas bostandyǵynan aiyrý oryndarynan 60 adam bosatyldy. Olaryń 38-i blokposttardy kesip ótý arqyly turǵylyqty mekenjailaryna jetkizildi. Qalǵandary ýaqytsha turatyn jerlerge – týystaryna, áleýmettendirý ortalyqtary men qoǵamdyq qorǵa jetkizildi», - delingen komitet aqparatynda.
ShQO boiynsha jaǵdaidy QAJ departamenti probatsiia qyzmetteri basshylyq etý bóliminiń basshysy Oljas Jakiiarov aityp berdi.
«Mundai jaǵdailarda koloniia men túrme qyzmetkerleri turǵylyqty jerine jetýge kómektesedi. Tótenshe jaǵdai rejimi kezinde Shyǵys Qazaqstan oblysy boiynsha QAJ departamenti OV-156/6 mekemesinen eki sottalǵan bosatyldy», - deidi ol.
Onyń aitýynsha, bosap shyqqan sottalǵandarǵa QAJ komitetiniń nusqaýyna sáikes turǵylyqty jerine deiin ári qarai jol júrý úshin baǵyttyq paraqtar, sondai-aq koronavirýs infektsiiasynyń aldyn alý boiynsha jadynamalar, kóp ret qoldanylatyn maskalar, qolǵaptar men antiseptikalyq quraldar tabys etiledi.
«Qazirgi ýaqytta tótenshe jaǵdai rejimine bailanysty barlyq qyzmetter úilesimdi yrǵaqpen jumys isteidi jáne qalalar men oblystardyń Politsiia departamentteriniń basqa da qyzmetterimen ózara is-qimyl jasalyp jatyr. Bizben barlyq qajetti sharalar qabyldandy, bul baǵyttaǵy jumys jalǵasady», - deidi bólim basshysy.
