Foto: Senat baspasóz qyzmeti
Mádeniet jáne aqparat ministri Aida Balaeva reseilik «Slova patsana» serialyna qatysty pikir bildirdi, dep habarlaidy Kazinform agenttigi.
«Bul film óte qyzý talqylandy. Alýan túrli pikir bar. Bireýleri film zorlyq-zombylyqty nasihattaidy dese, endi bireýler adamdardyń psihikasyna teris áser etetindigin aitady. Filmdi kórgen joqpyn, sondyqtan mazmuny jaily aita almaimyn. Árine, IIM-ge jiberdik. Degenmen, búginde biz eshqandai zań buzýshylyq bolǵan joq dep aiqyndadyq», - dedi ministr Ortalyq kommýnikatsiialar qyzmetindegi brifingte BAQ ókilderiniń saýalyna orai.
Onyń atap ótýinshe, týyndy qazaqstandyq shyndyqty pash etpeidi.
«Serialdyń bizdiń jastarymyzben ortaq eshteńesi joq. Jastarymyzda lýdomaniiamen, esirtkige táýeldilikpen, mádenietsizdikpen bailanysty problema bar. Sondyqtan Memleket basshysy ár sóz sóileýinde Qazaqstan azamattary men jastarymyz óziniń dástúrin saqtaýy, eńbek etýi, ózin damytýǵa tyrysýy tiis ekendigin aityp keledi. Menińshe, tyiym salý arqyly eshteńeni sheshe almaimyz. Óitkeni, filmge tyiym salý týraly usynys berilgenniń ózinde aqparattyq tehnologiialar zamanynda ony jasaý múmkin emes», - dedi Aida Balaeva.
