Foto: shutterstock.com
Ult.kz-te jihankez jýrnalist Dinara Bolattyń ózge paiymy
Kóp eresek adamnyń júikesi sharshaǵan. Qazirgi tańda halyqtyń basym bóliginde kúndelikti turmys, jumystaǵy qysym, qarjylyq máseleler men tolassyz jeke oilar mazalaidy. Sol sebepti eshqandai adam artyq shýdy qalamaidy. Eshkimge artyq dybyspen ziianymyzdy tigizbei tynyshtyqty saqtaý mádenieti osy ǵasyrdyń negizgi ádebi bolyp tur.
Úide
Tańerteńgi ýaqytta kóp adam endi oianyp, óz-ózine kelip, aǵzasy jańa kúnge beiimdelý úshin belgili ýaqyt jaily jaǵdaidy qajet etedi. Bul kezde úide bireý oiatqyshqa oianbai onyń qaita-qaita oinaýy, erte turǵan otbasy múshesiniń úide aiqailap sóilep júrýi, ne basqa bireýdiń ózgeniń úiine qatty sóilep kirip kelýi otbasy múshelerine jaisyz áser etedi. Tańerteńgi jaisyzdyq adamnyń tutas sol kúnine áser etý qaýpi bar.
Qoǵamdyq oryndarda
Qoǵamdyq oryndarda bireý mańyzdy sharaǵa daiyndalyp turýy múmkin. Avtobýsta bireýi sharshap kele jatady. Al endi biri óz oilarymen ońasha qalǵysy kep, terezeden qala tirligine súisiný kóńil kúiimen otyrady. Sondai kezde adamdardyń bir-birimen daýystap sóilesýi, qulaqqapsyz mýzyka tyńdap, serial kórýi nemese telefonmen, videobailanyspen uzaq sóilesýi úlken yńǵaisyzdyq týdyrady.
Takside
Al taksi sekildi qoǵamdyq kólik sol jerdegi júrgizýshi men jolaýshy úshin ortaq keńistik. Taksige otyrǵanda qatty kóńil kótergisi kelip otyratyn jolaýshy óte sirek. Sol sebepti jolaýshy kólikke otyrǵanda aldymen mýzykanyń daýysyn basyp, ol jaiǵasqan soń án qoiýǵa ruqsat suraý, ánniń daýysyn birge kelise otyryp retteý ‒ qarapaiym ádeptilik.
Dámhanada
Sol sekildi shaǵyn dámhana, kofeinialarda sol jerde júrgen ákimshi, ne baristaǵa unaityn ánder emes, kelýshilerdiń barlyǵyna birdei unaityn, eshqaisynyń mazasyn almaityn fondyq, ritmi jai ánder qosylýy ‒ kelýshilerge qurmet.
Aýrýhanada
Aýrýhanalarda tynyshtyq saqtaý etikalyq másele emes, saýyqtyrýdyń bir bóligi. Naýqastarǵa tynyǵý qajet. Al dárigerlerge únemi nazaryn artyq shýsyz fokýsta ustaý kerek. Sondyqtan daýysty báseńdetý, telefonyn únsiz rejimge qoiý jai ǵana mádeniettiliktiń qarapaiym kórinisi.
PAIYM
Zaman mobildi bolǵan saiyn, qoǵamda qajý bar. Ár adamnyń júikesine salmaq túspeitindei, ár oqýshy, stýdent, ár maman óz qyzmetine nazaryn shoǵyrlandyra alatyndai, nemese syrtqa bilinbese de ózin jaisyz sezinip kele jatqan janyńyzdaǵy naýqastyń mazasyn almaityndai bir-birimizdiń jai-kúiimizge qurmetpen qaraý adamgershiliktiń, mádeniettiń belgisi. Izgi qoǵam tek ár jaǵdaiǵa túsinistikpen qaraityn, janashyr adamdardan quralatynyn umytpaiyq.
Dinara Bolat
.jpg)
