AQSh-tyń ádilet ministrligi Twitter-diń burynǵy eki qyzmetkeri jáne olardyń Saýd Arabiiasyndaǵy áriptesin Er-Riiadqa tyńshylyq jasady dep aiyptady. Sot qujattaryndaǵy derekke sáikes, olar áleýmettik jeli qoldanýshylarynyń jeke derekterin jinap, Saýd Arabiiasy biligine bergen jáne sol úshin syiaqy alǵan. Qujatta Er-Riiadty synaǵan alty myńnan astam Twitter qoldanýshysynyń jeke deregi jaily aitylady.
AQSh-tyń quqyq qorǵaý organdary Twitter-diń burynǵy qyzmetkerleri Áli Alzabara, Ahmad Abýammo jáne Ahmed Almýtairidi shetel agenti retinde tirkelmei, Saýd Arabiiasyna jumys istedi dep aiyptap otyr. AQSh azamaty Ahmad Abýammo qamaýǵa alynǵan. AQSh-tyń ádilet ministrliginiń habarlaýynsha, qalǵan ekeýi basqa elge ketken. Qoldanýshylardyń jeke derekterin bergeni úshin Twitter-diń burynǵy qyzmetkerleri Er-Riiadtan aqsha jáne ózge de qymbat zattar alǵan.
AQSh-tyń Taiaý Shyǵystaǵy negizgi áriptesi sanalatyn Saýd Arabiiasyn Batys adam quqyǵyn óreskel buzdy dep birneshe ret synaǵan. Ótken jyly oppozitsiialyq jýrnalist Jamal Hashoggidiń ólimine bailanysty Er-Riiad ótkir synaldy. Saýd Arabiiasy buǵan qosa, Iemendegi azamattyq soǵysqa aralasqany úshin synǵa ushyraǵan.
