Atyraý oblysynyń ákimi Mahambet Dosmuhambetov jumys saparymen Qyzylqoǵa aýdanynda bolyp, Muqyr selolyq okrýginiń aýmaǵyndaǵy aýyldardy aralady, dep habarlaidy "Ult aqparat" óńir ákimdiginiń resmi saityna silteme jasap.
Oblys ákimi aldymen Jamansor jáne Janterek eldi mekenindegi bastaýysh mektepterge bardy. Munda bilim berý nysanynyń syiymdylyǵyna sai, 53-60 oqýshy bilim alady.Áitse de, kabinetter qajettiligine qarai jabdyqtalǵan.Tipti, balalar úshin ishki ájethana da bar. Tek, ǵimarattyń tarlyǵynan Jamansordaǵy mektepte ashana men sport zal qarastyrylmaǵan. Alaida, aýyl halqyn alańdatatyn másele bul emes. Olar atalǵan eldi mekenderde orta bilim beretin mektep joq dep shaǵymdandy. Óitkeni, aýyl balalary bastaýysh synyptan soń, orta bilim alý úshin ózge aýdandarǵa bólinip ketýge májbúr.
- Aýylymyzda orta mektep joq. Balalarymyzdy Jylyoi, Maqat aýdandaryndaǵy internatqa jiberemiz. Ózimizdiń baqylaýymyzda bolmaǵan soń, alańdap otyramyz, -dedi aýyl turǵyny.
Mahambet Dosmuhambetov orta bilim beretin mektep bilikti mamandy qajet etetindigin alǵa tartty. Al, aiadai aýyldy mamandarmen tolyq qamtý ekitalai ekendigin de jasyrmady. Sondyqtan da bul másele bir nusqaýmen sheshilmeitindigin basa aitty. Áitse de, «aýyl halqynyń ótinishi eskerýsiz qalmaidy», - dedi oblys ákimi.
Ary qarai Muqyr aýylyna attanyp, qurylysy aiaqtalmaǵan 400 oryndyq mádeniet úiin kórdi. 2017 jyly bastalǵan qurylysty jedeldetýge jumystanyńdar dep tapsyrma berdi. Al, 2018 jyly qalanǵan 424 oryndyq orta mekteptiń negizgi qurylysy aiaqtalǵan. Endi, ishki jumystar júrgizilgen soń, jańa oqý jylynda paidalanýǵa beriledi dep kútilýde.
Aýyl ishinde 1984-1985 jyldary salynǵan ǵimarattar da bar. Qoldanystaǵy eski nysandardyń biri aýyl ákimdiginiń ǵimaraty bolsa, endi biri - aýdandyq sport mektebiniń bólimshesi. Tozyǵy jetken bul mekemelerge jańa ǵimarat qajet. Budan soń, oblys ákimi keńeitýdi qajet etetin Muqyr dárigerlik ambýlatoriiasynyń jumysymen tanysty. Mundaǵy máselelerdi de jaýaptylarmen birge talqyǵa saldy. Ary qarai, oblys basshysy Saǵyz aýylyna at basyn burdy. Mundaǵy aýyldyq okrýg ákimi apparaty ǵimaratynyń da jaǵdaiy ońyp turǵan joq. 1952 jyly salynǵan ákimdiktiń ábden tozyǵy jetken. Al, Ómirov atyndaǵy óner mektebiniń ǵimaraty shaǵyn. Bul jaǵdailarmen tanysqan oblys ákimi qajetti jobalardyń qaralatyndyǵyn aitty. Kúrmeýi kóp kelesi másele Saǵyz temirjol vokzaly. 1952 jyly boi kótergen vokzal ishi tym tar. Sondyqtan jańa ǵimarat qajet. Alaida, aýdan ákimdiginiń aitýynsha, Saǵyz temirjol vokzaly «QazaqstanTemirJoly» AQ-ǵa qarasty.
- Bul jerge jolaýshylar igiligi úshin jańa nysan salýdy kózdep otyrmyz.Alaida temirjol vokzaly QTJ AQ teńgeriminde bolǵandyqtan , joba jasaqtaý múmkin bolmai tur. Sondyqtanda QTJ AQ-na hat joldap, teńgerimge tapsyrýyn suradyq. Jaýap kelgen soń, jobalaý-smetalyq qujattamany jasaqtaýǵa jumystanamyz, - dedi aýdan ákimi Nursultan Bisembiev.
