10 tamyzdyń Abai kúni dep belgilenýi - uly aqynǵa kórsetilgen joǵary qurmet. Bul týraly Dostyq úiinde halyqaralyq Túrki akademiiasy jáne Qazaqstan halqy Assambleiasynyń uiymdastyrýymen ótken «Bekem baýyrlastyq bailanystar: Manastan Abaiǵa deiin» atty alqaly jiynda aityldy, dep habarlaidy QazAqparat.
«Barshańyz biletindei, biyl Abaidyń 175 jyldyq mereitoiy. Qazaqstannyń Tuńǵysh Prezidenti, Elbasymyz Nursultan Nazarbaev 1995 jyly aqynnyń 150 jyldyq toiynda «Abai jylyn ótkizgen jaqsy. Abai jyryn jattaǵan durys. Al onyń tereń oiy men pikiri tek aityla júrer áńgime bolmai, kúnbe-kúngi tirligimizge bir kirpish bop qalanyp jatatyn naqty iske ainalsa – quba-qup» degen bolatyn. Al QR Prezidenti Qasym-Jomart Toqaev «Abai jáne HHI ǵasyrdaǵy Qazaqstan», «Abai – rýhani reformator» degen maqalalarynda atqarylýǵa tiisti naqty mindetterdi mejelep berdi. Eń bastysy, osy jyldyń ereksheligi: 10 tamyz – Abai kúni dep belgilenýi. Bul – uly aqynǵa kórsetilgen joǵary qurmet. Ulttyq rýhaniiatymyz ben ádebietimizdi damytýǵa jáne sóz ónerin qasterleýge jasalǵan erekshe, tarihi qadam», - deidi Qazaqstan halqy Assambleiasy Tóraǵasynyń orynbasary Janseiit Túimebaev.
Onyń aitýynsha, elimizde tirshilik keship jatqan barlyq etnos ókilderi oishyl aqynnyń shyǵarmashylyǵyn nasihattap, onlain festival uiymdastyrǵan.
«Osy festivalde memlekettik tilimizdi tereń meńgergen basqa etnos ókilderi 500-den asa Abaidyń muralaryn qazaq tilinde jatqa oqydy. Bul da Abai shyǵarmashylyǵyn nasihattaýǵa qosqan úlken úles dep esepteimiz. Darhan Qydyráli basqaryp otyrǵan Halyqaralyq túrki akademiiasy el men eldi jaqyndastyryp, túrki áleminiń tarihyn, tili men ádebietin, mádenietin zertteý baǵytynda kóptegen jobany júzege asyryp kele jatyr. Sonyń ishinde qyrǵyz halqynyń murasyna da erekshe kóńil bólip, búgingi jiynǵa deiin de «Manas entsiklopediiasy», «Manas sózdigi», «Manas eposynyń qoljazbasy», «Manas eposynyń filosofiiasy» atty eńbekterdi jaryqqa shyǵardy. Manas eposyn Shoqan Ýálihanov, Muhtar Áýezov te zerttegenin barshamyz jaqsy bilemiz. Manas jyrynyń qazaq tilinde jaryq kórýi – qazaq ádebietiniń qoryna qosylǵan altyn qazyna dep bilemiz», - deidi ol.
