Endi «Qazposhta» tutynýshylary talap-tilekteri men kompaniia qyzmetine qatysty barlyq suraqtaryna Qpost chat-boty arqyly jaýap ala alady.
Búgingi tańda «Qazposhtanyń» arnaiy saitynda jáne áleýmettik jelilerdegi paraqshalarynda chat-bot jumysy iske qosylǵan. Naqtyraq aitqanda, qazirden bastap virtýaldy qyzmetti post.kz saitynan nemese Facebook-taǵy resmi paraqsha arqyly alýǵa bolady. Al, 28 tamyzdan bastap bul onlain qyzmet túri Telegram kanalda da iske qosylatyn bolady.
Osy ýaqytqa deiin kompaniia tutynýshylarynyń barlyq suraqtary men aryzdary segiz bailanys kanaly arqyly alynǵan. Sáikesinshe, tutynýshylarmen bailanys jasaý jáne jaýap berý birshama ýaqytty qajet etetin. Al, jańa onlain qyzmet arqyly ótinishter tek bir kiris kanaly arqyly jetkiziletin bolady. Sondai-aq, kanal jumysynyń qyzmetin chat-bottan bólek Sapa qyzmeti mamandary baqylap, tutynýshylarǵa shuǵyl kómektese alady. Eger chat-bot tutynýshy máselesine qatysty suraqqa jaýap bere almasa, bailanys ortalyǵy operatoryna qosady.
Kompaniianyń virtýaldy kómekshisin paidalaný arqyly sálemdemelerdiń jetkizilýin, ornalasqan mekenjaiyn, tarifter týraly naqty aqparatty jáne poshta qyzmetin alýǵa bailanysty barlyq máseleler boiynsha keńes alýǵa bolady.
Aita keteiik, elimizde «Tsifrlyq Qazaqstan» memlekettik baǵdarlamasyn iske asyrý aiasynda barlyq jetekshi salalardy tsifrlandyrý úderisi júzege asýda. Osy oraida, búgingi kúnge deiin «Qazposhta» qyzmetin tsifrlandyrý barysynda 800 myń adam tsifrlyq biliktiligin arttyryp, 90 000-nan astam qazaqstandyq tsifrlyq keńselerdiń qyzmetin tutynǵan. Sonymen qatar, tsifrlandyrý aiasynda seriktestik bólimsheler jelisi, sálemdemelerdi jedel jetkizetin ushqyshsyz ushý apparattary, elektrondy qyzmetterdiń birneshe túri engizilgen.
