Tutynýshylar quqyǵyn qorǵaý boiynsha biryńǵai platforma qurylady. Biryńǵai júie tutynýshylarǵa keri bailanys jasaýǵa múmkindik beredi. Bul týraly AntikorLive baǵdarlamasynda QR Saýda jáne integratsiia vitse-ministri Ásel Janasova aitty, dep habarlaidy QazAqparat.
«Men bul ministrlikke kelgenime 2 ai boldy. Ministrlik strategiiasynyń tsifrlyq tujyrymdamasyn bekittik. Jobalyq keńse quryp, top múshelerine jobalardy basqarý boiynsha ádisterdi úirettik. Bizdiń jobalar baǵyt boiynsha jumys isteidi. Olar: ishki saýda, tehnikalyq retteý jáne tutynýshylar quqyǵyn qorǵaý. Ár baǵyt boiynsha jekelei jobalar qolǵa alyndy. Mysaly, keibir tutynýshy alǵan taýaryn dúkenge 14 kún ishinde qaitaryp berýge quqyly ekenin bilmeidi. Qazirgi ýaqytta osy baǵyt boiynsha biryńǵai platforma quryp jatyrmyz. Bul platforma arqyly azamat aryz-shaǵymyn jazyp, ol boiynsha memlekettik organdar jumys isteitin bolady. Biryńǵai júie tutynýshylarǵa keri bailanys jasaýǵa múmkindik beredi. Qazan aiynda pilottyq joba júzege asyrylady. Onyń nátijesin jyl sońyna deiin kóretin bolamyz», - deidi QR Saýda jáne integratsiia vitse-ministri Ásel Janasova.
Ol bul jobanyń kásipkerler úshin qandai paidasy bar ekenin aitty.
«Tutynýshylardyń aryz-shaǵymynan keiin kásipkerler qyzmet kórsetý sapasyn arttyrady. Mysaly, saýda úiiniń iesi ol jerde ne bolyp jatqanyn tolyq baqylaýda ustai almaýy múmkin. Endi halyqpen keri bailanys arqyly ne bolyp jatqanyn, zań boiynsha qalai áreket jasaý kerektigin túsinetin bolady. Iaǵni, qyzmet kórsetý sapasyn jaqsartady», - deidi ol.
