Aqtóbe qalasyndaǵy №9 mektep-gimnaziiada arnaiy mamandar usaq shybyndarǵa qarsy ýlaý jumystaryn júrgizgen. Bul kezde bilim ordasynda 4 synyptyń oqýshylaryna sabaq ótip jatqan, dep habarlaidy QazAqparat.
Oqiǵa 14 qazan kúni keshki ýaqytta boldy. Ol kezde №9 mektep-gimnaziiada ekinshi aýysym balalary bilim alyp jatqan.
«Ýlaý jumysy saǵat shamamen 19:00-de júrgizildi. Mektepte synyptardyń ishi emes, tek jertóle zalalsyzdandyryldy. Sodan aýa jeldetkish qubyrlary arqyly joǵary kóterilgen shyǵar. Negizi sol kezde oqýshylardyń kóbi úiine ketti. Bolsa 2-3 synyp bolǵan shyǵar. Keibiri saǵat 20.00 – 20.30-ǵa deiin oqidy. Ýlanǵan, emhanaǵa tústi, aryz tústi degen joq. Direktorymyz qalalyq bilim bólimine ketti. Buǵan deiin osy jumys jazda, kóktemde, kúzde, iaǵni demalysta júrgiziletin edi», - dedi kezekshi muǵalim Oleg Svet.
Mektepte shirkeilerdi ýlaý jumysy júrgizilgenin oblystyq Sanitariialyq-epidemiologiialyq baqylaý departamenti de rastady. Alaida, ondai tapsyrma berilmegenin atap ótti.
«Aqtóbe qalalyq Sanitariialyq-epidemiologiialyq baqylaý basqarmasy usaq shybyndarǵa qarsy dezinsektsiialyq jumys júrgizý jóninde uiǵarym bergen joq.
Oqiǵaǵa keler bolsaq, qazirgi tańda oqýshylar arasynda ýlaný jaǵdaiy boiynsha shuǵyl habarlama túsken joq. Aldyn ala aqparatqa sáikes, jospardan tys dezinsektsiialyq jumystar mekteptiń jertólesinde sabaq ýaqytynda shirkeige qarsy júrgizilgen.
QR DSM 2018 jylǵy 28 tamyzdaǵy «Dezinfektsiia, dezinsektsiia men deratizatsiiany uiymdastyrýǵa jáne júrgizýge qoiylatyn sanitariialyq-epidemiologiialyq talaptar» buiryǵynyń 141-tarmaǵyna sáikes, óńdeý júrgiziletin jerlerde óńdeýge qatysy joq adamdardyń bolýyna ruqsat etilmeidi. Osy jaǵdaiǵa qatysty tiisti sharalar qabyldanady. Nátijesi boiynsha qosymsha habarlaimyz.
Al ýlaý jumysyna keler bolsaq, mektepter bizden ruqsat almaidy, kelisimshartpen jumysty júrgize beredi», - dep habarlady oblystyq Sanitariialyq-epidemiologiialyq baqylaý departamentiniń baspasóz qyzmetinen.
