Elorda soty Ulttyq biryńǵai testileý (UBT) kezinde jalǵan qujat jasady dep aiyptalǵan bilim berý ortalyǵynyń basshysyna qatysty úkim shyǵardy, dep habarlaidy Sputnik Qazaqstan.
Nur-Sultan qalasy Almaty aýdanynyń №2 aýdandyq soty jalǵan qujat jasady dep aiyptalǵan "140+1 bilim berý ortalyǵynyń" basshysy Nurbek Qanaiǵa qatysty úkim shyǵardy.
"2021 jyldyń jazynda oqýshylarǵa UBT-dan joǵary ball jinap berip, bilim berý ortalyǵynyń atyn shyǵarý maqsatynda keńse tehnikasyn paidalana otyryp, testileýden ótip jatqan tórt mektep túleginiń jeke kýálikterindegi fotosýretterdi UBT-ǵa daiyndalyp jatqan basqa tulǵalardyń fotosýretterine aýystyrǵan", - dep habarlady Nur-Sultan qalalyq sotynyń baspasóz qyzmeti.
Sottalýshynyń kinási kýálardyń aiǵaqtarymen, tárkilengen keńse jabdyqtarymen, jalǵan qujattarmen, jeke kýálikterdegi fotosýretterdi aýystyrý týraly sot-tehnikalyq qorytyndylarmen dáleldendi.
Sot jazany jeńildetetin shyn júrekten ókiný siiaqty mán-jailardy nazarǵa aldy.
Nátijesinde sot Qanaiǵa probatsiialyq baqylaý ornata otyryp, bir jylǵa bas bostandyǵyn shekteý jazasyn taǵaiyndady. Úkim áli zańdy kúshine engen joq.
UBT-da bolǵan daý
Biyl maýsym aiynda áleýmettik jelide Tursynbek Qabatovtyń qyzy úshin UBT-ny basqa adam tapsyrdy degen aqparat tarady. Osy aqparatty jariialaǵan zańger Abzal Quspannyń aitýynsha, UBT-ny Ádemi Amanǵalidyń ornyna ýniversitettiń 2-kýrsynda grantta oqityn stýdent tapsyrǵan.
Nur-Sultan qalasy politsiia departamenti 13 maýsym kúni bolǵan oqiǵany rastady. Tergeý kezinde jalǵan jeke kýálik jasaǵan 22 jastaǵy kúdikti ustaldy. Qylmystyq kodekstiń 385-baby 1-bóligi boiynsha qylmystyq is qozǵaldy.
Artynan Tursynbek Qabatovtyń ózi áleýmettik jelide video jariialap, ózi de, otbasy da alaiaqtyq týraly bilmegenin, bul testke daiyndaityn ortalyqtyń isi ekenin aitty.
