Qazaqstanda turmysy jaqsy otbasylardyń memlekettik járdemaqydan óz erkimen bas tartýy talqylanyp jatyr. Áleýmettik jelide mundai sheshim qabyldaǵan azamattar kómektiń muqtaj adamdarǵa berilgenin jón sanaitynyn aitqan, dep habarlaidy ult.kz.
Kópbalaly áke Nurlan Minaidarovtyń pikirinshe, balalaryn asyraýǵa tabysy jetkilikti otbasy járdemaqydan bas tartyp, qoldaýdy qarjyǵa qinalyp júrgen otbasylarǵa qaldyra alady.
Kópbalaly ana Zaǵipa Ahmetqanova da tólemnen bas tartqanyn jetkizdi. Onyń aitýynsha, otbasynyń qazirgi tabysy kúndelikti qajetine jetedi. Sondyqtan járdemaqy alýǵa quqyǵy bolsa da, ony paidalanbaýdy uiǵarǵan.
Sonymen qatar, Aqmola oblysy Zerendi aýdanynda turatyn Asen men Merýert Jaqsylyqovtar endi memlekettik qoldaýǵa muqtaj emes ekenin málimdedi.
Otaǵasynyń aitýynsha, memlekettiń kómegimen óz kásibin ashyp, turmysyn túzegen. Qazir erli-zaiyptylardyń turaqty tabysy bar. Sondyqtan balalaryn óz kúshterimen qamtamasyz etetinin aitty.
Aita keteiik, Murat Ábenov járdemaqy máselesine qatysty pikir bildirdi.
Ne jaǵdai boldy?
Qazaqstanda balalarǵa jáne kópbalaly otbasylarǵa beriletin memlekettik járdemaqyny taǵaiyndaý tártibi ózgeredi. Úkimettiń 2026 jylǵy 5 qazandaǵy №870 qaýlysyna sáikes, 2027 jylǵy 1 qańtardan bastap birqatar járdemaqy otbasynyń turmys jaǵdaiyn baǵalaý arqyly beriledi. Iaǵni tólem taǵaiyndaǵanda otbasynyń kómekke qanshalyqty muqtaj ekeni eskeriledi.
Ózgeris bala týǵan kezde beriletin birjolǵy járdemaqyny, bala bir jarym jasqa tolǵanǵa deiingi kútimine arnalǵan memlekettik járdemaqyny jáne tórt nemese odan kóp balasy bar otbasylardyń ai saiynǵy járdemaqysyn qamtidy. Qaýlyda turmys deńgeii joǵary «A» jáne aýqatty «V» sanatyna jatqyzylǵan azamattarǵa bul tólemderdi taǵaiyndamaý qarastyrylǵan. Al járdemaqy alyp júrgen otbasy osy sanattarǵa ótse, tólemi toqtatyla turady.
Otbasynyń jaǵdaiyn anyqtaý úshin kámeletke tolǵan músheleriniń jeke derekterin tekserýge kelisimi qajet bolady. Baǵalaý kezinde banktik málimetter, nesie boiynsha qaryz somasy, ai saiynǵy tólemder men merzimi ótken bereshek týraly aqparat ta paidalanylmaq. Otbasynyń jaǵdaiy keiin nasharlap, ai saiynǵy baǵalaý nátijesinde kómek alýǵa sáikes sanatqa aýyssa, tólemdi qaita jalǵastyrý múmkindigi qarastyrylǵan.
Qazir kópbalaly otbasylarǵa beriletin járdemaqy tabysyna qaramastan taǵaiyndalady. Sondyqtan keibir ata-analardyń tólemnen óz erkimen bas tartýy — olardyń jeke sheshimi. Al aldaǵy ózgeris járdemaqy taǵaiyndaǵanda otbasynyń materialdyq jaǵdaiyn eskerýdi kózdeidi. Jańa tártip 2027 jyldan kúshine enedi.
