QR Ishki ister ministrligi bylapyt sóileý, qorlaý, kemsitý jáne otbasyndaǵy uryp-soǵý úshin ákimshilik jaza túrleri ózgeriske ushyraǵan zań normasyn túsindirdi, dep habarlaidy QazAqparat tilshisi.
Vedomstvonyń túsindirýinshe, endi «janjaldar» úshin úsh táýlikke emes, bes táýlikke (Ákimshilik quqyq buzýshylyq týraly kodekstiń 73-baby) qamaýǵa alynady. Iaǵni, jaýapkershilik kúsheitildi. Bul quqyq buzýshylyqtyń aldyn alý jáne zardap shekkenderdi qorǵaý úshin jasalǵan. Al qol jumsaý jáne denegi zaqym keltirgeni úshin ákimshilik qamaýǵa alý burynǵysha Ákimshilik quqyq buzýshylyq týraly kodekstiń 73-1, 73-2 baptaryna sáikes 20 táýlikke deiin qaldy.
«Bul baptardaǵy aiyppul túrleri eskertý berýmen almastyryldy.
Mundaǵy logika qarapaiym. Buryn «janjalqoi» otbasylyq biýdjetten aiyppul tóleitin. Odan áieli men balalary zardap shekti.
Sonymen qatar, eskertý – jazanyń balamaly túri ǵana ekenin bilý mańyzdy. Eger ekinshi ret bolsa, onda eskertý bolmaidy. Bul jaǵdaida sot 20 táýlikke deiin qamaýǵa alynady. Barlyǵy naqty istiń mán-jaiyna bailanysty», - dep atap ótedi ministrlikten. Otbasy-turmystyq qatynastar salasynda quqyqqa qarsy is-áreketterdi (ÁQBtK 73-baby) jáne densaýlyqqa qasaqana jeńil ziian keltirý (ÁQBtK 73-1-baby) nemese uryp-soǵý (ÁQBtK 73-2-baby) áreketterin alǵash ret jasaǵan adamdardy, eger olar jábirlenýshilermen, aryz berýshilermen tatýlassa jáne keltirilgen ziiannyń ornyn toltyrsa, tek sot qana jaýapkershilikten bosatýy múmkin. Endi osyndai faktiler boiynsha barlyq isti politsiia sotqa jiberedi.
Eger únemi uryp-soǵý bolsa, onda QK-niń 110-baby (azaptaý) qoldanylady. Atalǵan baptyń birinshi bóligine sáikes 2 jylǵa deiin, al ekinshi bóliginde 4 jyldan 7 jylǵa deiin bas bostandyǵynan aiyrý qarastyrylǵan.
