Qazaqstanda otbasyndaǵy turmystyq zorlyq-zombylyq azaimai otyr. Bul týraly «Turmystyq zorlyq-zombylyq qurbandaryna arnalǵan daǵdarys ortalyǵy» direktorynyń orynbasary Tatiana Mido aityp berdi, dep habarlaidy QazAqparat.
«Bizdiń ortalyqqa turmystyq zorlyq-zombylyq kórgen júzdegen áiel júginedi. Biz olardy turǵylyqty mekenjaiyna qaramastan qabyldaimyz. Tipti, taǵdyry tálkekke túsken sheteldik qyz-kelinshekterge de qoldaý kórsettik. Mysaly, Almatyda ýaqytsha turyp jatqan Resei, Moldova, Ózbekstan, Tájikstan, Qyrǵyzstan áielderine de qol ushyn sozdyq», – deidi Tatiana Mido.
Onyń aitýynsha, buryn kúieýinen zorlyq-zombylyq kórgen áielder kóbine jurttan uialyp, ol jaitty jasyryp qalatyn. Qazir jaǵdai ózgerdi. Názik jandylar ózderin qorǵaityn zańnyń, túrli ortalyqtardyń bar ekenin túsindi.
«Ortalyqqa júginetinderdiń sany jyl sanap artyp keledi. Eger 2019 jyly ortalyq 310 áiel men balaǵa kómek kórsetse, 2020 jyldyń 1 tamyzyndaǵy jaǵdai boiynsha bizge 217 áiel tústi. Biz karantin kezinde de shtattyq rejimde jumys istedik. Ol ýaqytta bizge 56 adam júgindi. Bul óte kóp. Daǵdarys ortalyǵynda oryn qalmady. Desekte, kúieýinen taiaq jegen 5-6 balasy bar áielderge barynsha jaǵdai jasadyq», – deidi direktordyń orynbasary.
Sonymen qatar, T.Mido karantin kezinde ortalyqqa túsken eki balaly ananyń taǵdyry týraly aityp berdi.
«Elde tótenshe jaǵdai jariialanǵan kezde, bizdiń ortalyqqa eki balasy bar áiel tústi. Ol balalaryn Almaty qalasyndaǵy perzenthanada bosanǵan. Alaida, olarǵa týý týraly kýálik berilmegen. Sebebi, anasynyń jeke kýáligi bolmaǵan. Keiin anyqtalǵandai, osydan 15 jyl buryn kámelettik jasqa tolmai turǵan kezinde Almatyǵa anasymen Ózbekstannan qonaqqa kelgen eken. Anasy ony jazǵy demalysta týysqandaryna qaldyryp ózi eline qaityp ketken. Kóp uzamai anasy qaitys bolyp ketedi. Sóitip ol bizdiń elde qalyp qoiǵan. 2005 jyldan beri bul áiel Qazaqstan aýmaǵynda eshqandai qujatsyz ómir súrip kelgen. Ol Qazaqstannyń da, Ózbekstannyń da azamaty emes. Bizdiń ortalyqqa túskennen keiin balalarynyń jáne óziniń qujatyn daiyndaýǵa kómektestik. Ózderińiz bilesizder, bul ońai sharýa emes. Aldaǵy ýaqytta da biz oǵan kómektesetin bolamyz», – deidi ol.
Ortalyq málimetterine sáikes, munda 8 túrli áleýmettik qyzmet kórsetiledi. Áielderge zańgerler men psiholog mamandarynyń keńesi uiymdastyrylyp, áleýmettik qoldaý kórsetiledi.
