sýret:ambox.ru
Turmystyq zorlyq-zombylyq isi boiynsha ákimshilik qamaýǵa alynǵan adamdardyń sany 6 myńnan 13 myńǵa deiin artty. Bul týraly Ákimshilik politsiia komitetiniń ókili málimdedi, dep habarlaidy "Ult Aqparat".
Mamandar bergen málimet boiynsha ótken jyly turmystyq zorlyq-zombylyq isi boiynsha 79 myńnan astam adam ákimshilik jaýapkershilikke tartyldy jáne bir myńǵa jýyq azamattyń ústinen qylmystyq is qozǵaldy.
"Jańa zańnama sheńberinde (2023 jyldyń ekinshi jartyjyldyǵynda) turmystyq janjaldar týraly 50 myń ótinish qaraldy. 64% (30,6 myń) materialdar boiynsha ákimshilik is júrgizý qozǵaldy. Olar buryn 33,5% nemese 17 myń boldy. Ákimshilik qamaýǵa alynǵan adamdardyń sany 2 esege artty, iaǵni 6 myńnan 13 myńǵa deiin. Sotta 27 myńnan astam otbasy tatýlasty.Sonymen qatar, ministrlik zorlyq-zombylyqqa ushyraǵan otbasylarmen profilaktikalyq jumysty jandandyrdy. Ótken jyly politsiiada turmystyq janjaldar týraly 100 myńǵa jýyq habarlama tirkelgen. Onyń ishinde 15 myń turmystyq zorlyq-zombylyq faktisin politsiia qyzmetkerleri anyqtady. Barlyq tirkelgen faktiler boiynsha kináliler zańda kózdelgen jaýapkershilikke tartyldy. Árbir otbasylyq deboshir zańmen zorlyq-zombylyq jasaǵany úshin 5 táýlikten bastap ómir boiyna bas bostandyǵynan aiyrýǵa deiin ákimshilik qamaýǵa alý jaýapkershiligi qarastyrylǵanyn bilýi kerek, - deidi QR IIM Ákimshilik politsiia komitetiniń tóraǵa orynbasary Renat Zýlhairov.
Aita keteiik, ótken jyldyń 1 shildesinen bastap qylmystyq jáne ákimshilik kodeksterge engen túzetýler boiynsha politsiia ótinish berýden turmystyq quqyq buzýshylyqtardy tirkeýdiń anyqtaýshy sipatyna kóship, ákimshilik is qozǵalady. Endi sońǵy quqyqtyq baǵalaýdy sot beredi.
