Taraz qalasynyń 2 sotynda jappai tártipsizdikterge qatysqan 8 er adamnyń isi qaraldy. Sýdia prokýror suraǵan jazany berdi, dep habarlaidy Sputnik Qazaqstan agenttigi oblystyq sottyń resmi saityna silteme jasap.
Sot materialdaryna sáikes, 4 qańtar kúni J., I., L., E., J., Á., A. jáne S. esimdi azamattar Taraz qalasynda múlikti joiyp, politsiia qyzmetkerlerine qarsy kúsh qoldanǵan.
"Atap aitqanda, J. keshki saǵat 19.00 shamasynda tergeýmen anyqtalmaǵan basqa da belgisiz tulǵalarmen birigip, qoǵamdyq tártipti óreskel buzyp, quqyq qorǵaý qyzmetkerleriniń zańdy talaptaryna baǵynbai, olarǵa qarsy kúsh qoldanyp, iaǵni qorǵanys qalqandarynan birneshe ret teýip jappai tártipsizdikke belsendi qatysqan", - deidi sot mamandary.
Sol siiaqty basqa sottalýshylar da politsiiaǵa qarsy shyqty. Bireýi rezina taiaǵyn tartyp alsa, taǵy ekeýi qyzmettik kólikterdi qiratqan. Al Á. esimdi sottalýshy politsiiaǵa birneshe ret tas laqtyrǵan. Artynan múlikti qiratýmen ushtasqan jappai tártipsizdikke belsene aralasqan.
Taǵy bireýi áskeri qyzmetshileriniń zańdy talaptaryna baǵynbai, qalqanmen birneshe márte uryp tepken. 8 sottalýshynyń barlyǵy óz kinásin moiyndady.
Prokýror probatsiialyq baqylaý belgilei otyryp, shartty túrde 4 jylǵa bas bostandyǵynan aiyrý jazasyn taǵaiyndaýdy surady. Jábirlenýshi de qarsy bolǵan joq. Zań boiynsha sottalýshylardyń áreketi aýyr qylmystar sanatyna jatady jáne ony jasaǵany úshin 3 jyldan 8 jylǵa deiin bas bostandyǵynan aiyrý jazasy qarastyrylǵan.
"Jaza taǵaiyndaý kezinde sot qylmystyq jaýaptylyq pen jazany jeńildetetin mán-jailar retinde sottalýshylardyń shyn júrekten ókinýlerin, sottylyqtarynyń bolmaýyn tanydy. Sotpen aýyrlatatyn mán-jailar anyqtalǵan joq", - deidi mamandar.
Sot úkimimen jappai tártipsizdikterge qatysqan 8 er adamnyń árbireýi shartty túrde 4 jylǵa bas bostandyǵynan aiyrý jazasyna kesildi.
Úkim zańdy kúshine engen joq.
Aita keteri, ondai jaza kezinde adamdy túrmege otyrǵyzbaidy. Biraq baqylaý sharalary buzylsa, bas bostandyǵynan aiyrý jazasyn qoldanýy múmkin.
