UNCTAD derekterine sáikes COVID-19 pandemiiasy saldarynan týyndaǵan jahandyq ekonomikalyq daǵdarys nátijesinde 2020 jyly álemdegi tikelei investitsiialar kólemi 42% tómendegen.
Bul úrdiske qaramastan ótken jyly Túrkiianyń Qazaqstandaǵy investitsiialar kólemi 2019 jylmen salystyrǵanda 1,3% artyp, 362,4 mln. AQSh doll. Qurady, dep habarlaidy "Ult aqparat" QR Syrtqy ister ministrliginiń resmi saiyna silteme jasap.
Atalǵan investitsiialar kóleminiń Qazaqstannyń Táýelsizdik jyldarynda Túrkiiadan jyldyq esepte tartylǵan eń úlken tarihi rekordtyq kólem bolǵandyǵy erekshe qýantady. Bunyń aldynda eń kóp investitsiia Túrkiiadan 2007 jyly 347,6 mln. doll. kóleminde jáne 2019 jyly 357,8 mln. doll. kóleminde tartylǵan bolatyn.
Qazaqstannyń Túrkiiadaǵy Elshisi Abzal Saparbekuly: «Koronavirýs pandemiiasyna qaramastan, 2020 jyly túrkiialyq kompaniialarmen túrli formattarda 400-den astam kelissóz ótkizip, 30 áleýetti investordyń Qazaqstanǵa saparyn uiymdastyrdyq. 2020 jyldyń qorytyndysy boiynsha baýyrlas túrkiialyq kompaniialardyń investitsiialarymen Túrkistan, Soltústik Qazaqstan, Jambyl, Pavlodar, Qostanai oblystary men Nur-Sultan, Almaty jáne Shymkent qalalarynda jalpy quny 190 mln. doll. shamasynda jańa 8 joba iske qosyldy. Jobalar qataryna Túrkistan halyqaralyq áýejaiynyń qurylysy, dymqyl mailyqtar, qaptalǵan fanera, un óndiristerimen birge meditsinalyq diagnostikalyq ortalyqtardyń jáne kóp deńgeili parkingtiń ashylý bastamalary kiredi» dep málimdedi.
Syrtqy ister ministriniń orynbasary Almas Aidarovtyń aitýynsha: «Túrkiia baýyrlas memleket retinde qazirgi tańda Qazaqstandaǵy eń belsendi sheteldik investor qataryna kiredi. Osy jyldyń sońyna deiin túrkiialyq investorlardyń qatysýymen gazelektr plitalary, konditerlik ónimder, jaialyqtar, mineraldy sýlar men sýsyndar, FFP2-3 indýstrialdy jáne meditsinalyq respiratorlar, tirkemeler, tyńaitqyshtar men tómen voltty kabelderdiń óndirisi jáne qazandyq jylý kózi men tomoterapiia ortalyǵynyń qurylystaryn qamtityn 10 jańa jobany iske qosýdy josparlaýdamyz».
Jalpy 2023 jylǵa deiin Qazaqstandaǵy túrkiialyq investitsiialyq jobalardyń sanyn 2016 jylmen salystyrǵanda keminde eki ese arttyrý josparlanǵan.
Sonymen qatar, Túrkiia Saýda ministrliginiń «Túrkiianyń shet elderdegi investitsiialary týraly esebine» sáikes sońǵy tórt jyldyń ishinde Qazaqstannyń pozitsiiasy túrkiialyq kompaniialarǵa investitsiia úshin eń tartymdy elderdiń arasynda 14 orynǵa jaqsarǵan.
Búginde óńdeý ónerkásibi men memlekettik-jekemenshik seriktestigi mehanizmi sheńberinde Qazaqstanǵa investitsiia salǵan jahandyq túrkiialyq holdingter arasynda «Yildiz Holding», «Yildirim Holding», «YDA Holding», «Abdi Ibrahim», «Aselsan», «Anadolu Endustri Holding», «Borusan Holding», «TAV Havalimanlari Holding», «Ulkar Holding» jáne taǵy basqalary bar.
Túrkiialyq investitsiialardyń artýyna eki eldiń ózara joǵary deńgeidegi saparlary úlken serpin berýde. Atap aitqanda, Qazaqstannyń Tuńǵysh Prezidenti – Elbasy Nursultan Nazarbaevtyń Ankaraǵa 2018 jylǵy, Premer-Ministr Asqar Maminniń 2019 jylǵy jáne Premer-Ministrdiń orynbasary Muhtar Tileýberdiniń 2021 jylǵy Túrkiiaǵa saparlary barysynda aitarlyqtai mańyzdy ýaǵdalastyqtarǵa qol jetkizilgen bolatyn.
