Foto: Sportty damytý direktsiiasy
Antalia qalasynda WKF karateden eresekter arasyndaǵy Karate1 Premier League - Antalya 2024 týrniri aiaqtaldy, dep habarlaidy «Ult aqparat» Kazinformǵa silteme jasap.
Sportty damytý direktsiiasynan málim etkenindei, álemdik reitingide ár salmaq boiynsha úzdik 32 sportshy ǵana baq synaityn aýqymdy jarysqa 60 elden 400-ge jýyq tatami sheberi jinaldy. Qazaqstannan 14 karateshi qatysyp, eki altyn, úsh qola júldege ie boldy.
Kýmite baǵdarlamasynda Móldir Jańbyrbai (50 kg) altyn oljalasa, Bella Samasheva 55 kelige deiingi salmaqta qarsylas shaq keltirmedi.
Sondai-aq Aziia oiyndarynyń chempiony Nurqanat Ájiqanov 75 kelige deiingi salmaqta qola júldeni jeńip aldy. Nurqanat alǵashqy ainalymda Frantsiia ókilin, keiin Kventin Mahodendi (Belgiia) tize búktirip, shirek finalda túrkiialyq Iýrýr Omer Farýkke ese jiberdi. Úshinshi oryn úshin básekede frantsiialyq Entso Bertondy utty.
Osyǵan deiin Aziia oiyndarynyń qola júldegeri, Aziia chempiony Ásel Qanai men Tokio olimpiadasynda olja salǵan Sofia Berýltseva úzdik úshtikke ilikken edi.
«Halyqaralyq jarystarda Qazaqstannyń ánuranyn shyrqatý úshin kóp kúsh jumsaisyń. Men baqyttymyn, birinshi oryn aldym. Sportshynyń tuǵyrǵa shyǵyp, qolyn júreginiń tusyna qoiyp, óz eliniń ánuranyn oryndaý – úlken baqyt. Osy kezdegi sezimdi sózben aityp jetkizý múmkin emes. Meni qoldaǵan árbir janǵa alǵys bildiremin! Alǵa, Qazaqstan!», - dedi jarystan keiin Móldir Jańbyrbai.
Eske sala keteiik, budan buryn Sofia Berýltsevanyń Túrkiiadaǵy týrnirde qola júldeni jeńip alǵanyn jazǵan bolatynbyz.
