Túrkiiadaǵy «Ferfir» baspalar toby tarapynan ai saiyn shyǵatyn «Temrin» ádebi jýrnalynyń kezekti sany memleket jáne qoǵam qairatkeri Turar Rysqulovqa arnaldy, dep habarlaidy "Ult aqparat".
«Túrki áleminiń temirqazyǵy: T.Rysqulov» atty taqyryppen jaryq kórgen jýrnalǵa qazaqtyń «Qyzyl jebesi» atanǵan Turar Rysqulovtyń ómirbaianymen qosa táýelsizdik jolyndaǵy kúreskerligi men qairatkerligi, adamdyq qasieti men tulǵalyq portreti, tarihi shyndyq pen zamana aqiqaty týraly sóz qozǵaityn zertteýler men maqalalar toptamasy endi.
Atap aitqanda, belgili qazaq ádebiettanýshysy, ǵalym, aýdarmashy Ashýr Ózdemirdiń «Alty Alashtyń alyby Turar Rysqulov» atty zertteý eńbegi jáne ataqty «Qyzyl jebe» roman-epopeiasy men onyń avtory – jazýshy Sherhan Murtaza týraly «Eki uly tulǵa – bir uly týyndy» atty kólemdi maqalasy jaryq kórdi.
Sondai-aq, atalmysh toptamaǵa T.Rysqulov týrasynda qalam terbetken belgili tarihshy Darhan Qydyráliniń «Ultshyl kúresker» atty maqalasy, kórnekti qalamgerler Kólbai Adyrbekuly men Moldiiar Serikbaevtyń «Taǵy da Rysqulov haqynda» jáne «Ǵ.Músirepovtiń tapsyrmasy», Ǵalymjan Elshibaidyń «Áýezovti abaqtydan arashalap qalǵan Turar Rysqulov» atty maqalalary jáne ádebiettanýshy Serdar Ajardyń aýdarmasymen T.Rysqulovtyń Stalinge jazǵan haty enip, túrik oqyrmanyna jetti.
Maqalalardy túrik tiline aýdarǵan - Selma Balykchy men Móldir Ilgisheva.
