Túrkiianyń Antalia qalasynda Resei men Ýkraina syrtqy ister ministrleri Sergei Lavrov pen Dmitrii Kýleba kelissóz ótkizdi. Oǵan Túrkiia syrtqy ister ministri Mevliýta Chavýshoglý de qatysty.
Bul - soǵys bastalǵaly beri Máskeý men Kiev arasynda júrgizilgen joǵary deńgeidegi alǵashqy kelissóz.
Eki ministr arasyndaǵy áńgime shamamen 90 minýtqa sozyldy, osydan keiin Kýleba men Lavrov BAQ ókilderimen baspasóz máslihatyn ótkizdi.
Baspasóz jiyny kezinde Ýkraina syrtqy ister ministri Dmitrii Kýleba taraptar atysty toqtatý týraly kelisimge kelmegenin, Mariýpol turǵyndaryna gýmanitarlyq dáliz uiymdastyrý máselesi de sheshilmegenin aitty.
"Ýkraina Mariýpolge deiin jáne Mariýpolden gýmanitarlyq dáliz qurýdy, sondai-aq beibit turǵyndardyń gýmanitarlyq máselelerin sheshý úshin kem degende bir táýlikke atysty toqtatýdy usyndy. Resei tarapy buǵan kelispedi. Men kelissózderdi jalǵastyrýǵa daiynmyn", - dedi ministr.
Kýleba eger Resei muny jasaǵysy kelmese, Ýkraina soǵysty toqtata almaitynyn basa aitty.
Buǵan deiin eki eldiń arnaiy delegatsiialary Belarýste úsh ret kelissóz úshin kezdesken. Taraptar Ýkrainanyń keibir qalalarynda beibit turǵyndarǵa arnap "gýmanitarlyq dáliz uiymdastyrýǵa" kelisken.
Aita keteiik, Resei áskeri Ýkrainaǵa 24 aqpanda basyp kirgen. Ýkraina jerindegi shaiqastarda myńdaǵan adamnyń oqqa ushyp, jaralanǵany týraly málimetter shyǵyp jatyr.
