Túrkiianyń óńirlerinde orman órtterinen kelgen shyǵyn boiynsha shuǵyl sharalarǵa bastapqy kezeńde 50 mln túrik lirasy (shamamen 6 mln dollar) bólindi.
Bul týraly Prezident Rejep Taiyp Erdoǵan senbide Antaliia provintsiiasyndaǵy orman órtteri aimaǵyn tekserý qorytyndysy boiynsha ótken baspasóz máslihatynda aitty, dep habarlaidy Anadolu agenttigi.
«Árbir zardap shegýshi memleketten kómek alady. Shyǵyn tolyq kólemde óteledi, salyq tólemderi keiinge qaldyrylady. Bir jyl ishinde apat aimaǵyndaǵy barlyq órtengen turǵyn úiler qaita salynady. Qurylys óńirlerdiń sáýlet erekshelikterin eskere otyryp júrgiziletin bolady», - dedi Erdoǵan.
Prezident sondai-aq órtten zardap shekkenderge úilerdi jalǵa berý úshin qarajat bólinetinin aitty. Memleket fermerlerge, mal ósirýshilerge jáne jylyjai ielerine keltirilgen zalaldy óteidi.
Orman órti aimaǵyndaǵy 35 aýyldy elektr energiiasymen jabdyqtaý qalpyna keltirildi. Saqtyq sharasy retinde 12 eldi meken elektr qýatynan ýaqytsha ajyratyldy.
El prezidenti 31 shilde kúni keshki ýaqyttaǵy jaǵdai boiynsha orman órtteriniń kóptegen oshaqtary oqshaýlanyp, sóndirilgenin atap ótti.
«Sońǵy úsh kúnde ortman órtterin sóndirýge 4 myń adam tartyldy. Apat aimaǵynda 6 ushaq, 45 tikushaq, 1 ushqyshsyz tikushaq, 9 ushqyshsyz ushý apparaty, 117 órt sóndirý kóligi jumys istep jatyr», - dep atap ótti Erdoǵan.
Erdoǵan Ýkraina, Resei, Ázerbaijan jáne Iran elderi Túrkiiaǵa kómekke ushaqtar jibergenin eske saldy.
«Órtten zardap shekken barlyq orman alqaby qalpyna keltiriledi. Jańbyrly maýsym bastalǵan kezde jańa aǵashtar otyrǵyzyla bastaidy», - dedi Erdoǵan.
Eske sala keteiik, Túrkiiada birneshe kúnnen beri orman órtteri órshýde.
Órt sóndirý qyzmetteriniń kúshimen Túrkiiadaǵy 98 orman órtiniń 88-i oqshaýlandy. Buǵan deiin Túrkiiada órt kezinde qaza tapqandar men zardap shekkenderdiń arasynda qazaqstandyqtar joq ekendigi habarlanǵan bolatyn.
