Túrkiia maska taǵýǵa qatysty shekteýdi alyp tastady. Endi elde jeldetý jetkilikti bolsa jáne áleýmettik qashyqtyqty saqtaý múmkindigi bolsa, maska túrindegi qorǵanys quraldaryn paidalaný qajet emes, dep habarlaidy QazAqparat.
Túrkiianyń Densaýlyq saqtaý ministri Fahrettin Koja koronavirýstyń taralýymen kúres jónindegi ǵylymi keńes otyrysynyń qorytyndysy boiynsha ótken brifingte elde ashyq aýada jáne jaqsy jeldetiletin jerlerde maska kiiýdi mindetteý alynatynyn aitty.
«Bizge endi kóshede maska taǵýdyń qajeti joq. Biraq bul meditsinalyq atribýt kúndelikti ómirimizden ketpeidi. Tiisti qashyqtyq saqtalmaǵan jabyq ǵimarattarda áli de qorǵanys quraldaryn paidalanýymyz kerek. Tar keńistik, ushaq pen kólik kabinalary, kórermen zaldary, meditsina mekemeleri men oqý oryndarynda áli de maska taǵýǵa týra keledi. Sonymen qatar, qart adamdar men sozylmaly aýrýǵa shaldyqqan adamdarǵa qorǵanýǵa keńes beriledi», - dedi ministr.
Sonymen qatar, elde COVID-ke qarsy erejelerdiń basqa da jeńildetýleri bekitildi.
Endi el mektepterinde synyptarda virýs juqtyrǵan oqýshydan kem bolsa, synyp karantinge jabylmaidy, al qalǵan balalar oqýyn oqshaýlanbai jalǵastyra alady.
Adamdarda koronavirýs belgileri bolmasa, olardan PTR testileri alynbaidy. COVID-19 juqtyrǵandarmen bailanysta bolǵan jáne aýrý belgileri joq adamdar endi qoǵamnan oqshaýlanbaidy.
Sonymen qatar, Túrkiiada kelesi aptadan bastap barlyq meditsinalyq mekemelerde otandyq TURKOVAC vaktsinasy egiledi.
Ministrdiń aitýynsha, Túrkiia epidemiialyq protsestiń bastapqy kezeńinde barlyq qajetti sharalardy qabyldaǵan jáne sonyń nátijesinde pandemiia qurbandarynyń barynsha az bolýyn qamtamasyz etken alǵashqy elderdiń biri boldy.
Túrkiia Densaýlyq saqtaý ministrliginiń málimetinshe, ótken táýlikte elde COVID-19-ǵa 407 536 synaq júrgizildi, onyń ishinde 56 780 adamnan virýs anyqtaldy, 189 adam qaitys boldy, dertten 68 268 adam jazyldy.
Elde adamdarǵa salynǵan vaktsinanyń jalpy sany 145 801 884 dozaǵa deiin ósti.
