© Photo: NTV telearnasynyń saity
Túrkiianyń Alaniia qalasynda qazaqstandyq týrister mingen shaǵyn avtobýs apatqa ushyrady. Saldarynan eki adam mert bolyp, 12 adam jaraqat alǵan, - dep habarlaidy "Ult aqparat".
Jergilikti BAQ-tyń habaryna qaraǵanda, oqiǵa Okýrdjalar kentiniń mańynda bolǵan.
NTV arnasynyń málimetinshe, týristik kóliktiń júrgizýshisi men ýkrainalyq gid sol jerde qaza tapqan. Al 12 týrist Alaniia jáne Manavgat aýdandarynyń aýrýhanalaryna jetkizilgen. Alty týrist aýyr jaraqat alǵan.
Jol apatyna qatysty Qazaqstan Syrtqy ister ministrligi de málimet usyndy.
«Búgin tańerteń Alaniia tasjolynda mikroavtobýs pen júk kóligi soqtyǵysyp, jol-kólik apaty oryn aldy. Oqiǵa saldarynan zardap shekkender bar. Aldyn ala alynǵan málimetke sáikes, avtobýsta Qazaqstan azamattary bolǵan. Oqiǵanyń barlyq mán-jaiy men bizdiń azamattarymyzdyń jaǵdaiyn anyqtaý úshin QR konsýly atalǵan óńirge shuǵyl túrde jolǵa shyqty», - dep habarlady Syrtqy ister ministrliginiń baspasóz qyzmetinen.
