Foto: tilalemi.kz
Túrkiiada qazaq tilin úirengisi keletinderdiń qatary artyp keledi, dep habarlaidy 24.kz.
Alǵash ret byltyr Ankara ýniversitetiniń til oqytý ortalyǵynda qazaq tili kýrsy ashylǵan edi. Bir jylda 50-den astam adam tildi erkin meńgerip shyqty. Tili basqa bolsa da, tilegi bir bul halyq qazaq tiline erekshe qyzyǵady. Sol sebepti stýdentter ǵana emes, túrli salada eńbek etip júrgen bilikti mamandar da tildi úirenip júr. Kestesi tyǵyz bolsa da, ár sabaqty qalt jibermeidi. Tipti kýrsqa qazaq mádenietin zerttep júrgen jas ǵalymdar da qatysyp júr.
"Qazaq tilin bir jyldan beri úirenip júrmin. Qazirgi tańda erkin meńgerdim. Negizi túrik tiline uqsas bolǵandyqtan qazaq tilin úirený qiyn bolǵan joq", - deidi EGE ýniversitetiniń PHD doktoranty Haiat Deniz Iltash.
Dáristi qazaq emes, túrik oqytýshy ótkizedi. Ulty basqa bolsa da, qazaqtyń ulttyq qundylyǵyn erkin meńgergen. Ár sabaqta bilim alýshylarǵa halqymyzdyń dástúri men bai mádenietin dáriptep otyrady.
"Qazaq tiline suranys, talap bolyp jatyr. Kóbinese ýniversitetimizdiń stýdentteri kelip úirenip jatyr. Jumys istep júrgen qyzmetkerler de qazaqsha úirengisi keledi", - deidi Til oqytý ortalyǵynyń oqytýshysy Sevil Karaman.
Tek qana úirenip shyǵýmen shektelmeidi, qazaq tilinde óleń jazatyndar da bar. Tipti án aitatyndar bar. Qazaqsha erkin sóilep júrgender de kóbeiip keledi.
Sabaq túrik tildi aýditoriiaǵa arnalǵan oqý quraly arqyly ótkiziledi. Oqýlyqty eki jyl buryn jergilikti uiymdarmen birlesip, "Til-qazyna" ulttyq ǵylymi-praktikalyq ortalyǵy ázirlegen. Bul – bastapqy deńgeige arnalǵan. Endi ortalyq mamandary orta deńgei boiynsha oqý quralyn basyp shyǵarýdy josparlap otyr.
"Qazaq tili kýrsyn ashýǵa túrik tarihy, mádeniet qory men Ankaradaǵy Qazaqstan elshiligi muryndyq boldy. Bizdiń maqsatymyz – Túrkiia men Qazaqstan arasyndaǵy diplomatiialyq qarym-qatynasty nyǵaityp, mádeni yntymaqtastyqty odan ári jetildirý. Sol sebepti osy baǵyttaǵy mindetimizdi jalǵastyra beremiz", - dep atap ótti Til oqytý ortalyǵynyń direktory, professor Timýr Gúltekin.
Qazaq tiline qyzyǵýshylyqtyń artýy qos el arasyndaǵy dostyq pen mádeni bailanystyń nyǵaiyp kele jatqanyn kórsetedi. Bul bastama túrki halyqtarynyń yntymaqtastyǵyn da kúsheite túspek.
