Dombyra kúnin Túrkiiadaǵy aǵaiyndar da atap ótti. Bul týraly Habar 24 arnasy habarlady.
Ankarada da kúi shertilip, án shyrqalyp qazaqtyń ulttyq aspabynyń múmkindigine álem jurtyn tánti etýde. Tipti Túrkiia prezidentiniń rezidentsiiasynda merekelik dýmandy kesh uiymdastyryldy.
Uly dala sazy Túrkiia rezidentsiiasyn jańǵyrtty. Prezident ákimshiligi janyndaǵy Ulttyq kitaphananyń saltanat saraiynda 50 dombyrashynyń qatysýymen merekelik kesh ótti.
Qazaqstannyń Túrkiiadaǵy elshiliginiń uiytqysymen ótken is-sharany saiasatkerler, qoǵamdyq qairatkerler, sheteldik diplomatiia missiia ókilderi men qala turǵyndary men qonaqtary tamashalady. Rýhty kóteretin kúilerdiń sanynda shek joq. Baba aspap úni kúi bolyp tógilip, án bolyp qalyqtady.
Merekelik keshtiń alqisasy Qurmanǵazynyń asyl muralarynyń biri «Balbyraýyn» kúiimen bastaldy. Túrkiianyń shartarabynan bas qosqan dombyrashylardy 4 ai boiy Qazaqstannyń mádeniet qairatkeri Elmira Eskendirqyzy Shenduran daiyndapty.
Orkestr quramynda qazaq-túrik mýzykanttarynan bólek tatar, noǵai, japon halqynyń ókilderi de bar. Qazaqstan jáne Mońǵoliianyń eńbek sińirgen ártisi Merýesh Bashai «Ágýgai dombyra» jáne «Dombyrasyz sán qaida» ánin shyrqady. Túrkiiada qazaqtyń qasietti quralyn dáriptep júrgen Shámshigúl Júsipova men túrik mýzykanty Sedat Solakoǵlu qazaq-túrik áigili áýenderinen poppýri shertti.
Sondai-aq Túrki dúniesi orkestriniń mýzykanty, belgili kompozitor Irfan Gúrdal Qorqyt Ataǵa arnalǵan týyndysyn oryndady. Biylǵy Ulttyq dombyra kúni Túrkiiada karantin talaptary jeńildegendikten be merekelik sharany tamashalaýǵa jinalǵandardyń qarasy kóp boldy. Kúmbirlegen dombyrany tamsanyp tyńdaǵan túrik jurty aqjarma tilekterin bildirdi.
«Keremet kún. Bizge de juǵysty bolsyn. Elimizde de dombyra kúni sekildi basqa mýzykalyq aspaptarymyzdyń da meiramy belgilensin dep tileimin. Búgingi keshte ózimdi atajurtta sekildi sezindim», - túrik depýtaty Metin Gúndoǵdý.
«Dombyra áýeni bizdi tańǵajaiyp tabiǵatqa jeteledi. Anadolydaǵy saz aspabynyń atasy dombyra», - dedi turǵyn Zeinep Koshker.
