Dollardyń qymbattaýyna bailanysty qazaqstandyqtar úshin shetelde demalý baǵasy aitarlyqtai ózgermeidi. Bul týraly «Týristik Qamqor» korporativti qorynyń baspasóz qyzmeti málim etti.
«Týristik joldamalardyń baǵasy negizinen AQSh dollarymen qalyptasatynyn eskersek, olardyń ózindik quny sál ǵana ózgeredi, tek teńgemen qaita eseptegendegi baǵasy ǵana ósýi múmkin. Sebebi týroperatorlar baǵalardy qazirgi kýrspen qaita esepteidi, al dollardyń kýrsy biraz óskeni baiqalady. Sol sebepti týristik joldamalardyń baǵasy ósken joq, tek onyń teńgemen qaita eseptegendegi quny ózgerdi degen durys bolady. Alaida, dollarmen alǵandaǵy joldamalardyń da baǵasy birqalypty emes. Baǵyty, maýsymy men qonaq úidiń jailylyǵyna qarai baǵanyń qubylýy qalypty jaǵdai. Dollardyń sál qymbattai túsýi ústimizdegi jylǵy jaz maýsymynda týristik aǵymǵa esh keri áserin tigizgen joq. Jazdyń úsh aiynda 140 myń qazaqstandyq týrkodpen shetelde demalyp úlgerdi. 2017 jyly 260 myń adam demalǵan bolatyn. Iaǵni, alys shetelde demalýdy josparlaityn otandastarymyzdyń sany jyl sanap artyp kele jatqanyn baiqaýǵa bolady», - dep habarlaidy «Týristik Qamqor» Korporativti Qory.
Sarapshylardyń málimetinshe, tamyz aiynyń sońynda musylman áleminde atalyp ótiletin úlken merekege bailanysty (Qurban ait- avt.) týristik joldamalardyń baǵasy birshama qymbattaidy.
«Túrkiia baǵytyndaǵy baǵalar qyrkúiekten bastap tómendei bastaidy. Bul kezde Qazaqstanda jańa oqý jyly bastalady, iaǵni demalýshylar sany kúrt azaiady. Qazaqstandyqtar Túrkiiany otbasymen demalý úshin tańdaidy. Ol úshin munda barlyq jaǵdai jasalǵan. Qyrkúiektiń sońynda Túrkiiada bes juldyzdy qonaqúide eki adamǵa shaqqandaǵy segiz kúndik demalystyń quny 800 myń teńge bolsa, Mysyrda týra osyndai demalys 500 myń teńgege túspek. Mysyrda kúz ben qys ailarynda demalys baǵasy joǵarylasa, Túrkiiadaǵy demalystyń baǵasy kerisinshe birtindep arzandai túspek», - delingen taratylǵan málimette.
