Túrkiianyń tabiǵat apattarymen kúres agenttiginiń málimeti boiynsha, juma kúni Túrkiianyń shyǵysyndaǵy Malatia provintsiiasynda magnitýdasy 4,7 baldyq jer silkinisi tirkeldi, dep habarlaidy "Ult aqparat" Anadoly agenttigine silteme jasap.
Tótenshe jaǵdailar jáne tabiǵat apattarymen kúres basqarmasynyń (AFAD) deregi boiynsha, jerasty dúmpýi Pýtýrdj aýdanynda jergilikti ýaqytpen 11:27-de 6,94 shaqyrym tereńdikte bolǵan.
Sondai-aq zilzala jaqyn mańdaǵy Gaziantep, Shanlyýrfa jáne Adiiaman provintsiialarynda sezilgen.
Malatia gýbernatory Aidyn Barýs ázirge qurbandar men múlikke zaqym kelgeni týraly aqparat túspegenin aitty.
«Jandarmeriia brigadasy men AFAD qazir sol aýdanda, biz jaǵdaidy muqiiat baqylap otyrmyz», - dedi provintsiia basshysy Anadoly agenttigine.
Túrkiia negizgi jaryq boiynyń joǵary jaǵynda ornalasqan, sol sebepti bul elde apatty zilzala jii bolady.
Biyl 30 qazanda Túrkiianyń batysynda 6,6 baldyq jer silkinisi boldy. Zilzala oshaǵy Izmir provintsiiasy Seferihisar qalasy mańynda Egei teńizinde tirkeldi. Izmirdegi apat saldarynan 20 ǵimarat qirap, 114 adam mert boldy, 1035 turǵyn zardap shekken bolatyn.
Eske sala ketsek, Izmit qalasynda 1999 jyly 7,6 baldyq zilzala bolyp, 17 myńnan asa turǵyn qaza tapty. 2011 jyly Vane qalasyndaǵy jerasty dúmpýinen 500-den asa adam kóz jumdy.
