Týrizm salasyn damytýda Túrkiia álem boiynsha jetekshi orynda. El ekonomikasynan túsetin basty kiristerdiń biri týrizm salasyna tiesili.
Bul týraly Almatyda qazaq jýrnalistermen kezdesken Túrkiia Mádeniet jáne týrizm ministrliginiń Ortalyq Aziia men Kavkaz aimaǵyndaǵy keńesshisi Alparslan Akyndjy myrza málimdedi: “2022 jylǵy derekterge sáikes, byltyr Túrkiiaǵa kelgen týrister sany 51,4 millionnan asty. Bul indet bastalmai turǵanda (2019 jyly) rekord bolǵan 51,8 millionnyń 99 paiyzyna teń. Osylaisha, týrizm salasy boiynsha Túrkiia álem boiynsha 3-oryn aldy. 2022 jyly Túrkiianyń týrizm kirisi 2019 jylmen salystyrǵanda 19 paiyzǵa artyp, rekordtyq kórsetkishke jetti. Bul 46,3 milliard dollarǵa teń. Bolashaqta 90 million týrist ákelip, kirisimiz 2028 jylǵa qarai 100 milliard dollarǵa jetedi”.
Alparslan Akyndjy myrzanyń pikirinshe, Uly Jibek jolyn damyta otyryp, Túrkiiadan Qazaqstanǵa týrister tartý da óte mańyzdy. Osylaisha, Qazaq eliniń ishki týrizmin damytýǵa múmkindik týady: “Týrizm salasy týraly másele kóterilgende mamandar daiyndaýǵa kóńil bólinýi tiis. Joǵary oqý oryndarynda týristerge qyzmet kórsetetin salalarda maman tapshylyǵy paida bolýy múmkin. Logistikany damytý nazardan tys qalmaýy tiis”.
Túrkiia otandyq týrizmdi damytýda marketingke nazar aýdarady. Ol – Jahandyq turaqty týrizm keńesimen (GSTC) úkimet deńgeiinde yntymaqtastyq týraly kelisimge qol qoiǵan álemdegi alǵashqy el. Nátijesinde 2030 jyldyń sońyna deiin 3 qadamdyq jospardy bekitedi jáne túrikter elinde 100 paiyz turaqty týrizm ekojúiesi qalyptasady. Brending jáne jahandyq tanytý is-sharalary jyldan-jylǵa artyp, 2028 jyldyń sońyna qarai týrizmge qatysty 9 baǵyt pen 20 ónim qosalqy brendi paida bolady. Osy maqsatta 2028 jylǵa qarai marketingtik kommýnikatsiialar biýdjeti 225 million dollarǵa teńgerilmek.
Alparslan Akyndjy myrzanyń aitýynsha, Túrkiia týrizmdi nasihattaý is-sharalarynda keibir naqty salalarǵa nazar aýdarady. Velosiped týrizmine erekshe nazar aýdara otyryp, senim, gastronomiia jáne sport týrizmi damytylady. Túrkiia úshin densaýlyq týrizmi de óte mańyzdy. Sonymen qatar jyl on eki ai túrikterdiń 81 qalasyna týristerdiń úzilmeýin qamtamasyz etýdi qarastyrady. Arheologiialyq jádigerler saqtalǵan aimaqtarǵa tartymdy baǵyttar usyna otyryp, álemdegi eń kóne neolit orny sanalatyn Tash Tepeler aimaǵyndaǵy arheologiialyq qazba jumystaryn jalǵastyrady. Side-Antaliia, Góreme-Kapadokiia, Izmirdegi Pergamon jáne Aslepion jerlerinde, Likiia jolynda jańa arheologiialyq saiabaqtardy ashady.
Náziia Joiamergenqyzy
