Túrkiia Siriianyń shekaraǵa jaqyn ornalasqan mańyzdy Jarablýs qalasyn "Islam memleketi" (IM) ekstremistik uiymynyń sodyrlarynan tazartatyn áskeri operatsiiasyn bastady. Túrkiialyq aqparat quraldarynyń habarlaýynsha, 24 tamyz kúni tańerteń bastalǵan operatsiiada shekara túbinen Jarablýs qalasy artilleriiadan atqylanyp, sońyra túrkiialyq áskeri ushaqtar qaladaǵy IM shepterin bombalaǵan.
"Túrkiia qarýly kúshteri men halyqaralyq koalitsiianyń áýe kúshteri Aleppo provintsiiasyndaǵy Jarablýs qalasyn DAISh (IM-niń arabsha ataýy) uiymynan bosatý operatsiiasyn bastady" delingen Túrkiia premer-ministriniń keńsesi taratqan aqparatta.
Operatsiiaǵa Túrkiia qarýly kúshteri men Túrkiia qoldaityn oppozitsiialyq toptardyń qaisysy qatysyp jatqany ázirge belgisiz.
Keshe Túrkiia syrtqy ister ministri Mevliýt Chavýshoglý Túrkiianyń Siriiamen shekaralas aimaqtary IM-nen "tolyqtai tazalanýy tiis" dep málimdegen.
20 tamyzda Túrkiianyń ońtústik-shyǵysyndaǵy Gaziantep qalasynda úilený keshinde jarylys bolyp, 53 adam qaza taýyp, 90-nan astam adam jaralanǵan. Ankara shabýylǵa IM sodyrlaryn aiyptaǵan.
