(Foto: Fredrik Sandberg / TT / EPA / TASS)
Túrkiia syrtqy ister ministrligi Shvetsiiada demonstranttardyń musylmandar kieli sanaityn Quran kitabyn órtegenin aiyptady, dep habarlaidy Azattyq radiosy.
Senbi kúni ýltraońshyl Hard Line partiiasynyń ókili Rasmýs Palýdan Túrkiianyń Shvetsiiadaǵy elshiligi aldynda Qurandy órtegen. Reuters-tiń jazýynsha, bilik ruqsat etken aktsiia kezinde jinalǵandar Túrkiia biliginiń Shvetsiiadaǵy sóz erkindigin shekteý talpynystaryna qarsy shyqqan.
Osydan keiin shved qorǵanys ministriniń Ankaraǵa sapary keiinge qaldyryldy, Túrkiia biligi Stokgolmdi kelisimdi buzdy dep aiyptady.
Stokgolmde Qurannyń órtelgenin kóptegen musylman elderi aiyptady. Arasynda Saýd Arabiia, Iordaniia, Kýveit bar. Túrkiiada narazylyq aktsiialary ótip, jinalǵandar shved týyn órtedi. Túrkiia SIM málimdeme taratyp, Quran órteýdi dinge jasalǵan shabýyl dep baǵalady. Túrkiia qorǵanys ministri Hýlýsi Akar Shvetsiiadaǵy narazylyqqa bailanysty Shvetsiia qorǵanys ministri Pol Ionsonnyń kelesi aptaǵa josparlanǵan Túrkiiaǵa sapary keiinge shegerilgenin málimdedi. Túrkiia sonymen birge Shvetsiiany NATO-ǵa qosylý boiynsha buryn jasalǵan kelisimderdiń bárin buzdy dep kinálady.
Shvetsiia syrtqy ister ministri Tobias Billstrem "elde sóz erkindigi bar, biraq bul Shvetsiia biliginiń onyń barlyq kórinisin qoldai beredi degendi bildirmeidi" dep málimdedi.
Resei Ýkrainaǵa basyp kirgennen keiin buryn beitaraptyq ustanǵan Shvetsiia men Finliandiia NATO-ǵa kirýge ótinish bergen. Ereje boiynsha, ótinish bergenderdi NATO-ǵa múshe elderdiń barlyǵy qoldaǵan kezde ǵana áskeri odaqqa jańa el múshe bola alady.
Túrkiia Shvetsiiaǵa birqatar talap qoiǵan. Arasynda "kúrdterdiń uiymdaryn terroristik uiym dep taný, Ankaraǵa qarý-jaraq berýge salynǵan tyiymdy joiý, Túrkiiaǵa birqatar kúrd belsendilerin berý" týraly talaptar bar.
