Ankara Reseimen arnany ashyq ustaý úshin qarsy sanktsiia salýdy josparlap otyrǵan joq. Bul týraly CNN Turk arnasyna bergen suhbatynda Túrkiia prezidentiniń ókili Ibragim Kalyn aitty, - dep habarlaidy Tengrinews.kz.
"Biz elimizdiń basymdyqtaryn eskere otyryp áreket etýimiz kerek. Reseimen sóilese alatyn faktor bolýy kerek. Bári teris ainalyp jatsa, Reseimen kim sóilesedi? Biz osy arnany ashyq qaldyrý úshin sanktsiialar paketin josparlap otyrǵan joqpyz", - dedi Kalyn.
Túrkiia prezidentiniń ókili Ýkrainadaǵy soǵystyń jalǵasýy Resei úshin úlken apatqa ainalýy múmkin ekenin eskertti. Onyń aitýynsha, Máskeýdiń Qyrymdy taný jáne Ýkrainany qarýsyzdandyrý týraly talaptary shyndyqqa janaspaidy.
Ibrahim Kalyn Resei men Ýkraina arasyndaǵy kelissózderdiń ekinshi kezeńi 2 naýryzda ótýi ekitalai dep sanaidy. Tehnikalyq máselelerge bailanysty kezdesý bir-eki kúnge keiinge shegerilýi múmkin.
Sondai-aq, Erdoǵannyń ókili reseilik sportshylardyń halyqaralyq jarystardan shettetilýi oryndy qadam emes ekenin aitty.
Túrkiia Reseige qarsy sanktsiialarǵa qatysqysy kelmeitinin Túrkiia syrtqy ister ministri Mevliýt Chavýshoglý da málimdedi.
"Biz mundai sanktsiialarǵa múldem qatyspadyq. Bul sanktsiialarǵa qatysýǵa nietimiz joq", - dep keltiredi ministrdiń Twitter-degi sózin Anadolu agenttigi.
Ótken demalys kúnderi Ýkrainaǵa jasalǵan shabýylǵa bailanysty Batys elderi Reseige qarsy jańa sanktsiialar saldy. Osylaisha, Eýroodaq kez kelgen reseilik ushaqtyń óz aýmaǵyna qonýyna jáne ushýyna tyiym saldy. EO Resei Ortalyq bankiniń rezervteri men aktivterin basqarýǵa qatysty operatsiialarǵa tyiym saldy.
