Foto: iStock.com / 9parusnikov
Túrkiia Ulttyq bilim ministrligi mektepter men JOO baǵdarlamalaryna "Túrkistan" ataýyn engizip, ony "Ortalyq Aziia" uǵymynyń ornyna qoldanýǵa sheshim qabyldady. Ministr Iýsýf Tekinniń aitýynsha, bul qadam tarihi ádilettilikti qalpyna keltirý jáne túrki áleminiń birligin nyǵaitý maqsatynda jasalǵan, dep habarlaidy Ult.kz.
Ministrlik bul ózgeristi otarshyldyq kezeńinen qalǵan jat geografiialyq ataýlardy alyp tastaý saiasaty aiasynda júzege asyrmaq. Tekinniń sózinshe, oqý baǵdarlamalary Túrkiianyń tól tarihi leksikasyna negizdelýi tiis, al "Túrkistan" ataýy túrki áleminiń tarihi-mádeni aýqymyn dál beineleidi.
Turkish Minute deregine súiensek, "Túrkistan" buryn tek Qazaqstandaǵy qala emes, túrkitildes halyqtar mekendegen Uly dala men Turan aimaǵynyń tarihi ataýy bolǵan. Termin Qazaqstan, Qyrǵyzstan, Ózbekstan, Túrikmenstan, Tájikstan jáne Shyńjańdaǵy uiǵyrlarǵa qatysty qoldanylady.
Ankara bul qadamdy Túrkiiany túrkitildes elderdiń mádeni ortalyǵy retinde kúsheitý strategiiasymen bailanystyrady. Sonymen birge, ortaq túrki álipbiinde kitap shyǵarý jumystary da bastalǵany habarlandy.
Sarapshylardyń aitýynsha, búgingi Túrki álemi 300 millionnan astam adamdy qamtidy jáne 4,5 mln sharshy shaqyrymdyq aýmaqty alyp jatyr. Qazaqstandyq tarihshylar da óńirdiń tarihi ataýynyń "Túrkistan" bolǵanyn, "Ortalyq Aziia" termininiń Eýropa ǵalymdary engizgen keiingi uǵym ekenin atap ótedi.
