Túrkiialyq vaktsina osy jyldyń aiaǵyna deiin daiyn bolýy múmkin. Bul týraly Indýstriia jáne tehnologiialar ministri Mustafa Varank málimdedi, dep habarlaidy "Ult aqparat" Anadoly agenttigine silteme jasap.
Ministrdiń aitýynsha, vaktsinanyń klinikalyq synaǵy senbi kúni tańerteń bastaldy.
«Bul - kúrdeli protsess, synaqtyń birinshi fazasy eki aidan erte bitpeidi», - dedi Varank.
Vedomstvo basshysy vaktsinany óndirýge daiyn kásiporyndardyń bar ekenin atyp ótti.
«Eger barlyq kezeńdi sátti qorytyndylasaq, jyldyń sońyna deiin bizdiń 50 mln doza áleýeti bar óz vaktsinamyz bolady», - dep qosty ol.
Ministr vaktsinatsiianyń ekinshi kezeńinde ózi erikti bolatynyn aitty.
Sonymen qatar Varank muryn arqyly egiletin vaktsinanyń óndirisine de toqtaldy.
«Aqýyz negizinde jasalǵan vaktsinanyń bul túri – álemdegi jańalyqtardyń biri. Bul vaktsina muryn arqyly egiledi. Barlyq ýytty synamalar alynyp, janýarlarda synalyp, qosymsha jumystar atqarylǵan. Túrkiianyń Farmatsevtika jáne meditsinalyq jabdyqtandyrý agenttigine hat joldandy. Eger olar oń jaýap qaitarsa, adamdarǵa klinikalyq synaq jasaý bastalady», - dep málimdedi ministr.
Varank muryn arqyly egiletin vaktsina innovatsiialyq ekenin atap ótti. Onyń qoldanylýy álemde keń taralmaǵan.
«Degenmen óndirýshilerdiń aldyn ala qorytyndysy, zerthanalyq zertteýler men janýarlarǵa jasalǵan synama jaqsy nátije kórsetýde. Klinikalyq synama sátti aiaqtalady degen úmittemiz», - dep úmit bildirdi vedomstvo basshysy.
Varanktyń aitýynsha, túrli elder Túrkiiadan vaktsinamen qamtamasyz etýde kómek suraǵan.
«Kei elder vaktsina tasymaldaýda kómek suraidy, kei elder ortaq óndiristi jolǵa qoimaq niette. Mysaly, keibir elder synaqtyń úshinshi fazasyn birge ótkizýdi usynyp otyr. Bul áriptestik protsestiń uzaqtyǵyn qysqartar edi, sonymen qatar protseske halyqaralyq ózektilik berer edi. Sonymen qatar bul elder tasymaldaý máselesinde birinshi qaralady. Shetelden suranys bar», - dedi Varank.
