«Túrkistan–Shymkent–Tashkent» joǵary jyldamdyqty magistralyn salý barlyq óńirdiń týristik tartymdylyǵyn arttyrady. Bul týraly Ortalyq kommýnikatsiialar qyzmetindegi baspasóz máslihatynda QR Ulttyq ekonomika ministri Áset Erǵaliev aitty, dep habarlaidy QazAqparat.
Onyń atap ótýinshe, «Qýatty óńirler – el damýynyń draiveri» ulttyq jobasynyń «Kóliktik bailanysty qamtamasyz etý» baǵyty aiasynda ishki kólik jelisin damytý jáne aýmaqtardyń bailanysyn arttyrý kózdeledi. 11 myń shaqyrym respýblikalyq mańyzy bar jáne 27 myń shaqyrym jergilikti jol salynyp, jóndeledi. Bul jaqsy jáne qanaǵattanarlyq jaǵdaidaǵy respýblikalyq mańyzy bar joldyń úlesin 100 paiyzǵa deiin jáne jergilikti mańyzy bar avtojoldyń úlesin 95 paiyzǵa deiin jetkizýge múmkindik beredi. Sonymen qatar aýmaqtardyń bailanystylyǵyn arttyrý úshin birqatar iri joba da iske asyrylady.
«Atap aitqanda, ekinshi jol qurylysyn salý men «Dostyq–Moiynty» ýchaskesin elektrlendirý Qytai-Eýropa-Qytai jolynyń ótkizý qabiletin arttyrýǵa múmkindik beredi. «Darbaza–Maqtaaral» temirjol jelisin salý Saryaǵash stansasynyń ótkizý qabiletin 2 esege arttyrady. «Túrkistan–Shymkent–Tashkent» joǵary jyldamdyqty magistralyn salý barlyq óńirdiń týristik jáne investitsiialyq tartymdylyǵyn edáýir arttyrmaq. Almaty stansasyn ainalyp ótetin temirjol jelisin salý jobasy júk artý merzimin 2 táýlikke qysqartýǵa múmkindik beredi. Aýmaqtardyń bailanysyn arttyrý sharalaryn iske asyrý tranzit kólemin 30 mln. tonnaǵa onyń ishinde konteinerlerdi 1,6 mln tonnaǵa ulǵaitýdy qamtamasyz etedi», - dedi Áset Erǵaliev.
