«Elbasy N.Nazarbaevtyń Jarlyǵymen Túrkistan qalasynyń oblys ortalyǵy atanýy – tarihi oqiǵa. Bul ózgeris jergilikti halyqtyń ómirine zor serpilis ákeldi. Burynnan saýda-sattyqtyń ortalyǵy bolǵan shaharda bul baǵytta aldaǵy ýaqytta úlken jumystar qolǵa alynyp, eldiń ekonomikasynyń joǵarylaýyna ózindik úlesin qosady».
Bul – sanaly ǵumyryn kieli qalanyń damýyna arnaǵan túrkistandyq qariia Begadyl Sarýarovtyń pikiri.
Begadyl Sarýarulyn túrkistandyqtar jaqsy tanidy. Ol kóptegen jyldar boiy qaladaǵy jihaz jasaý ortalyǵynda eńbek etken. Saýda salasyn da jetik meńgergen. Árdaiym qalanyń bolashaǵyna baǵdar jasap, damý baǵytyn topshylap otyrady.
– Elbasy Túrkistan qalasyna kóńil bólip, ony oblys ortalyǵy dep jariialady. Bul – halyqtyń kópten kútken armany edi. Sebebi, Túrkistan burynnan da joǵary mártebege laiyq qala bolatyn. Mundaǵy saýda-sattyq júiesiniń damýy ózge qalalardaǵydai emes, ejelden qalyptasqan. Keńes ókimeti tusynda Qyzylorda oblysynyń, Shymkent qalasynyń jáne osy ólkeniń turǵyndary Túrkistanǵa kelip saýda jasaityn. Bazar baǵalary da ózge óńirlerge qaraǵanda áldeqaida tómen-tin. Qazir de solai. Qaladaǵy saýda-sattyq kólemi ulǵaimasa azaiǵan joq. Aldaǵy ýaqytta da bul júie zaman talabyna sai damyp, Túrkistan bolashaqta iri biznes ortalyǵyna ainalatynyna kámil senemin. Jalpy, Túrkistannyń túleitin shaǵy týdy. Bul kezeńge kýá bolyp otyrǵan búgingi urpaq óte baqytty, – deidi qariia.
Begadyl Sarýarov 1944 jyly týǵan. Túrkistan qalasynda bilim alyp, osynda otbasyn qurypty. Úsh ul, bir qyz tárbielep ósirgen jaidary jup búginde 8 nemere, 2 shóbereni erkeleter ata men áje atandy.
Aǵaiynǵa qadirli, kópshilikke syily qariia árdaiym el ishinde ótken jiyndarda eldi birlikke, yntymaqqa shaqyryp otyrady. Ózi de úlkenge qurmeti, kishige izetimen daralanyp turady. Adamgershilik qasietti bárinen joǵary qoiady. Qoǵamdyq isterge de belsene qatysyp, ózekti máselelerdiń tiisti deńgeide sheshilýine septigin tigizip keledi.
Sonymen qatar, jastarǵa bilgenin úiretýden jalyqpaidy. Qyzmet jolynda mol tájiribesinen tálim alǵan jas mamandar eńbek jolyn senimdi túrde bastaityn. Sońynan ergen kópshilik árbir isin úlgi tutady.
Qazaqtyń «uiada ne kórseń, ushqanda sony ilersiń» degen sózi bar. Begadyl aqsaqaldyń uldary men qyzdary ákeniń arda atyna kir juqtyrmai, ádildiktiń aq týyn biik ustady. Jubaiy Baqtybike de jaidary jan. Qai kezde qonaq kelse de qazany asýly.
Begadyl Sarýarulynyń Túrkistan qalasy úshin jasaǵan eńbegi jýyrda qala ákimdigi tarapynan joǵary baǵalandy. Iaǵni, qala kúni qarsańynda qala ákimi Álipbek Óserbaev Begadyl aqsaqaldy arnaiy marapattap, qurmet kórsetti.
«Siz búkil sanaly ǵumyryńyzdy saýda, ónerkásip salasyna arnap týǵan qalańyz úshin úlken eńbek sińirdińiz. Sizdiń eńbek jolyńyz táýelsiz elimizdiń jastary úshin Otanymyzǵa adal qyzmet etýdiń jarqyn úlgisi» delingen qala ákiminiń quttyqtaýynda.
Qazynaly qariia eńbek jolynda «1980 jylǵy Sotsialistik jarystyń jeńimpazy», «Sovet tutynýshylyq kooperatsiiasynyń úzdigi» medaldarymen marapattalǵan eken.
Kópke qamqor bolyp, eldiń alǵysyna bólengen Begadyl aqsaqal «qartaidym» dep qarap otyrǵan joq. Eldi birlikke, jastardy bilimge shaqyryp, áli de el ishindegi igi isterge uiytqy bolyp keledi.
"Ońtústik Qazaqstan" gazeti
