Qostanai oblysynda tótenshe jaǵdai oryn alǵan sátten Túrkistan oblystyq Jastar Resýrstyq ortalyǵynyń janynan jedel shtab qurylyp, barlyq 17 aýdan, qalyq Jastar resýrstyq ortalyqtarynda gýmanitarlyq kómekter qabyldaý bastalǵan bolatyn. Nátijesinde Jastar resýrstyq ortalyqtyrynyń uiymdastyrýymen Qostanaidaǵy órtke bailanysty 72 tonnadan astam gýmanitarlyq kómek jóneltildi. Bul týraly Túrkistan oblystyq óńirlik kommýnikatsiia qyzmeti habarlady.
Atalǵan sharaǵa Túrkistan oblystyq Qazaqstan halqy Assambleiasy músheleri, «AMANAT» partiiasy Túrkistan óńirlik filialy, oblystyq Qazaqstan stýdentter Aliansy belsendileri, «Jas Qadam» jastar uiymy, «Jastar Ruhy» jastar qanatynyń jastary da atsalysty. Azyq-túlik ónimderi, aýyz sý, jeke gigienalyq zattar jáne tósek-oryn jabdyqtary Maqtaaral aýdany, Arys jáne Túrkistan qalalarynda ornalasqan qabyldaý pýnktterinde jinalǵan.
Alǵashqy kúnniń ózinde qalalyq máslihat depýtattary, jergilikti jomart azamattar eń qajetti jáne jolǵa jaramdy zattarmen qamtyp úlgerdi.
Bir táýliktiń ishinde Maqtaaral aýdany, Arys jáne Túrkistan qalalarynan jalpy 4 júk kólik gýmanitarlyq kómek jinalyp, Qostanaiǵa jolǵa shyqty.
Gýmanitarlyq kómekke birqatar mekemeler de ózindik úlesin qosty.
Atap aitqanda, Q.A.Iasaýi atyndaǵy halyqaralyq qazaq-túrik ýniversitetiniń rektory Janar Temirbekova bastaǵan qoldaý toby 400 dana kórpe-tósek jetkizdi. Sondai-aq 500 muǵalim 1 kúndik jalaqylaryn «Biz birgemiz» qoryna aýdardy.
Atalǵan kómekti Qostanai oblysyna deiin jetkizý óńirdegi Jastar Resýrstyq ortalyqtarynyń basshylary, «Jastar Rýhy» jastar qanaty aimaqtyq filialynyń belsendilerine júkteldi. Óńirdiń 10 belsendi jasy apatty qalpyna keltirý jumystaryna qatysyp, zardap shekken turǵyndarǵa kómek kórsetedi.
