Túrkistan halyqaralyq áýejaiynan eń alǵashqy sheteldik reis Túrkiia eline ashylady. Bul týraly Túrkistan oblysynyń ákimi Ómirzaq Shókeev aitty, dep habarlaidy "Ult aqparat".
«Áýejai salyndy. Tolyq qoldanysqa berildi dep aitýǵa bolady. Úlken, keremet áýejai. Onyń ushyp-qoný jolaǵynyń uzyndyǵy 3 300 metrdi quraidy. Barlyq halyqaralyq standartqa sai keledi. Sonymen qatar terminaly da jaqsy salynǵan. Sheteldik bolsyn, ishki bolsyn barlyq reiske qyzmet kórsetýge múmkindigi bar», - dedi óńir basshysy Ortalyq kommýnikatsiialar qyzmeti alańynda ótken baspasóz máslihatynda.
Sonymen qatar ol Túrkistan halyqaralyq áýejaiynan sheteldik jáne ishki reister qashan jolǵa qoiylatyndyǵyn aitty.
«Reisterdiń ashylýy pandemiiaǵa bailanysty. Pandemiia sál báseńdese birinshi Túrkiianyń Ystanbul qalasyna reis ashylady. Odan keiin Mekkege ashylýy múmkin. Ony endi ýaqyt kórsetedi. Al 1 jeltoqsannan bastap kúndelikti ishki reisterdi bastaimyz. Buǵanda pandemiia áser etýi múmkin. Biraq bastaimyz», - dedi Ómirzaq Shókeev.
