Túrkistan oblysynyń ákimi Ómirzaq Shókeev Túrkistan qalasynda qandai nysandar salynatynyn aityp berdi, dep habarlaidy QazAqparat.
«Túrkistan qalasyn ári qarai damýynyń 2-kezeńine kelsek, Túrkistan 4 aýmaqta damityn bolady. Birinshi – áýejai aýmaǵynda 12 joba iske asyrylady. Onyń ishinde, qonaq úiler, áýejaiǵa qyzmet etein arnaiy nysandar, 400 ga qara órik baǵy, 50 ga jerge jylyjai, iri qara bordaqylaý kesheni, 1 200 malǵa taýarly-sút óndirý fermasy salynady», - dedi Shókeev Ortalyq kommýnikatsiialar qyzmetinde ótken baspasóz máslihatynda.
Ekinshi aýmaq – ákimshilik-iskerlik ortalyǵy, munda 57 jobany salý josparlanýda. Atap aitqanda iskerlik aimaqta 4,8 mln sharshy metr turǵyn úi salyp, 46 myń páter paidalanýǵa beriledi. Densaýlyq saqtaý, sport, mádeniet nysandary iske qosylady.
«Úshinshi aýmaq – B. Sattarhanov dańǵylynda sport kesheni, Iassy jelilik saiabaǵy jáne 182 ga ýniversitettiń botanikalyq baǵy salynady. Al tórtinshi aýmaq – Mádeni-rýhani ortalyq dep atalady. Bul jerde de Kúltóbe qalashyǵynyń tarihi nysandaryn qalpyna keltirý, «Áziret Sultan» mýzei-qoryǵynyń aýmaǵyn abattandyrý josparlanýda. Budan bólek, Kerýen sarai turǵyn úi kesheni, Amanat kottedji qalashyǵy, Medina Palace qonaq úii, Qylýet mádeni-rýhani ortalyǵy salynady», - dedi ákim.
Jalpy Túrkistan qalasyn damytýdyń 2-kezeńinde investitsiialardyń kólemi 1,3 trln teńge bolsa, onyń 1 trln teńgesi nemese 77%-y jeke investitsiialar bolǵan.
«Jańa keshendi jospardy iske asyrý nátijesinde 2025 jyly jalpy óńirlik ónim kólemi 3,6 trln teńgege jetedi degen boljam bar», - deidi Shókeev.
