Sýret: Baq.kz
Úkimet Parlamentke Túrkistan qalasyna rýhani-mádeni jáne tarihi ortalyq retinde damytý úshin erekshe mártebe berý týraly zań jobasyn usynady.
QR Premer-Ministri Oljas Bektenov «Túrkistan qalasynyń erekshe mártebesi týraly» zań jobasyn Parlament Májilisiniń qaraýyna engizý týraly qaýlyǵa qol qoidy.
Zań jobasy Memleket basshysynyń Túrkistan oblysyna jumys sapary barysynda bergen tapsyrmalaryn iske asyrý úshin ázirlendi.
Qujat Túrkistannyń Qazaqstannyń rýhani-mádeni jáne tarihi ortalyǵy retinde qalyptasýy men damýynyń, sondai-aq onyń memlekettik mańyzyn tanýdyń quqyqtyq negizderin belgileidi.
Zańnyń qabyldanýy qalanyń tarihi-mádeni mańyzy bar eskertkishteri men obektilerin, onyń ishinde Qoja Ahmet Iasaýi kesenesiniń búkilálemdik mura obektisi retindegi qorǵaý aýmaǵynda ornalasqan eskertkishterdi, basqarýdyń, saqtaýdyń, olardyń tutastyǵyn qoldaýdyń ońtaily júiesin qurýǵa múmkindik beredi.
Budan bólek, kesene aýmaǵynda ǵylymi arheologiialyq zertteý men ǵylymi-restavratsiia jumystaryn josparlaý men basqarýǵa múmkindik jasaidy.
Sondai-aq zań jobasy mádeni murany saqtaý jáne jańǵyrtý, dástúrli qolónerdi damytýdy, Túrkistan qalasyn rýhani-mádeni, tarihi jáne týristik ortalyq retinde damytý jáne ilgeriletýdi kózdeidi.
Qoja Ahmet Iasaýi kesenesiniń biregeiligin saqtaý, onyń ainalasynda bóten qurylys elementterine, kóshe jelilerin ózgertýge jol bermeý maqsatynda tarihi ortalyqtyń qurylysyn retteý aimaǵynda biiktigi 7 metrden asatyn, sondai-aq tarihi eskertkishtermen aýqymy, túsi jáne qurylys materialdarymen úilespeitin obektilerdiń qurylysyna jol berilmeidi.
Jalpy Túrkistan qalasynyń tarihi-mádeni mura obektilerin saqtaý jáne qorǵaý úshin árbir obektige tarihi-mádeni mura obektilerin qorǵaý jáne paidalaný salasyndaǵy zańnamaǵa sáikes olardyń qorǵaý aimaqtary belgilenedi.
Budan bólek, qalanyń bas josparyna engiziletin tarihi-sáýlet tirek josparlary men tarihi-mádeni mura obektileriniń tiisti jergilikti jerdiń karta-shemalary jasalady.
Bul rette qala aýmaǵynda tarihi-mádeni mura obektilerine qaýip tóndiretin qurylys, sharýashylyq qyzmetti júrgizýge tyiym salynady.
Arheologiia eskertkishteriniń tutastyǵyn, túpnusqalyǵyn, qundylyǵyn bolashaq urpaq úshin saqtaý maqsatynda Túrkistan qalasynyń arheologiia eskertkishteriniń rezervaty qurylady.
Arheologiia eskertkishteriniń rezervatyna engizilgen eskertkishterge qatysty qorǵaý saiasaty arheologiia eskertkishin turaqty inspektsiialaý, ony aldyn ala kútim jasaý jáne ony qoldaý baǵdarlamalaryn paidalanýǵa negizdeledi.
Sondai-aq QR Premer-Ministri Oljas Bektenov «QR keibir zańnamalyq aktilerine Túrkistan qalasyna erekshe mártebe berý máselesi boiynsha ózgerister men tolyqtyrýlar engizý týraly» zań jobasyn Parlament Májilisiniń qaraýyna engizý týraly qaýlyǵa qol qoidy.
Zań jobasy Túrkistan qalasynyń Qazaqstan Respýblikasynyń rýhani-mádeni jáne tarihi ortalyǵy retinde damýyn qamtamasyz etýge múmkindik beretin tiimdi institýtsionaldyq orta qurý úshin ýákiletti organdardyń, sondai-aq jergilikti ókildi jáne atqarýshy organdardyń quzyretterin keńeitýge baǵyttalǵan.
Zań jobasy sheńberinde jer paidalaný quqyǵyn berý, týristik qyzmetti júzege asyrý, Túrkistan qalasynyń arheologiia eskertkishteriniń rezervatyn qalyptastyrý jáne basqa da máseleler boiynsha qosymsha quzyretter berý usynylady.
Eske sala keteiik, 2021 jyly Túrkitildes memleketterdiń yntymaqtastyq keńesiniń beiresmi sammitiniń qorytyndysy boiynsha Túrkistan qalasyn túrki áleminiń rýhani astanasy dep taný týraly sheshim qabyldanǵan bolatyn.
