Úsh ǵasyrdan beri Túrkistandyq turǵynnyń úiinde saqtalyp kelgen qola qazan mýzei qoryna berildi, dep habarlaidy QazAqparat.
Túrkistanda «Mýzeige syi» aktsiiasy ótti. «Áziret Sultan» memlekettik tarihi-mádeni mýzei-qoryǵynyń uiymdastyrýmen ótken dástúrli sharada ǵalymdar men tarihshylar, mýzeige janashyr qala turǵyndary 30-ǵa jýyq qundy muralardy tabystady.
Olardyń qatarynda ataqty ǵalym Shaih Sýleiman Jamaldyń aýdarmasy boiynsha aýdarylǵan «Tafsir» kitaby, atadan balaǵa mura bolǵan ǵasyrlyq qazan, Temýridter memleketiniń Ámir Temir atymen 785-786 h.j. (1383-1385 jj.) jáne 832 h.j. (1428-1429 j.) Buhara aqsha saraiynda soǵylǵan fýlýsi, Qoqan handyǵynyń eki dana tamshy pishindi, bir dana sharshy pishindi monetalary, XVII ǵ. usaq saýda isinde ainalymynda júrgen tórtburysh pishindi mys aqshalar men Resei patshalyǵynyń nýmizmatikalyq jádigerleri, Qoja Ahmet Iasaýi kesenesinde jerlengen Kárson Beknazaruly Tańybai batyrdyń portreti, kózeshiniń móri bar.
Tańatarovtar áýleti alyp kelgen qoladan quiylǵan úsh ǵasyrlyq qazan kesenege kelýshilerdiń qyzyǵýshylyǵyn týdyrdy. Uldary men nemerelerin ertip, ózi bastap kelgen 75 jastaǵy Asylbek Tańataruly babalarynan jetken qimas murany ári qarai kesene mýzeiinde turýyn jón sanapty.
«Bereke daryǵan qola qazannan qazaqtyń qanshama jaqsylary men jaisańdary dám tatqan, ári áýlettiń de yrysy men berekesi ispettes. Búgingi kúni babadan taraǵan urpaqtar úlken áýletke ainalyp, tamyry keńge jaiylǵan, bilimdi de bilikti, imandy, elge eńbegi sińgen azamattarǵa ainalǵan», - dedi Asylbek Tańataruly.
Aita keteiik, qazirgi kezde mýzeidiń qor saqtaý jáne esepke alý bóliminiń qorynda 24 558 dana kóne jádiger memlekettik tirkeýge alynǵan, onyń 13 640 danasy negizgi qor, 10 918 danasy ǵylymi kómekshi qor esebinde. Olardyń basym kópshiligi túpnusqadaǵy tarihi qundy dúnieler.
