Túrkistan oblysynyń jurtshylyǵy «Qazaqstan temir joly» Ulttyq kompaniiasynyń qoldaýymen 95 vagon (3 myń tonnaǵa jýyq) shópti Mańǵystaý oblysyna jóneltti. Búgingi tańda oblys ákimdigi erikti jastardyń, kásipkerlerdiń, janashyr turǵyndardyń uiymdastyrýymen mal azyǵy tapshylyǵy oryn alǵan aýmaqtarǵa osylaisha kómek qolyn sozýda, dep habarlaidy "Ult aqparat".
Atap aitqanda, Arys qalasynan – 17 vagon, Saryaǵash qalasynyń temirjol stantsiiasynan – 51 vagon, Shymkent qalasynan – 18 vagon, Badam aýyldyq okrýginen – 4 vagon, Otyrar aýdanynan – 5 vagon shóp tielgen.
Oblystyq Aýyl sharýashylyǵy basqarmasynyń málimetinshe, biylǵy qýańshylyq batys óńirlerimen qatar, Túrkistan oblysynyń Keles, Saryaǵash aýdandarynyń jyl saiyn tabiǵi shóp oratyn alqaptaryna da áser etip, tabiǵi shóp bitik shyqpaǵan. Aldaǵy qys ailarynda mal azyǵynyń tapshylyǵyn aldyn alý maqsatynda oblystaǵy orman qorynyń jerlerinen tabiǵi shópterdi oryp alý uiymdastyrylýda, sonymen qatar Keles, Saryaǵash, Jetisai, Maqtaaral aýdandary Shardara, Otyrar aýdandarynyń jaiylymdaryn paidalaný týraly memorandým jasalǵan.
Oblystyń agroqurylymdaryna orman qory jerinen jaiylymdyq jáne shabyndyq jerler usynylyp, biylǵy jyldyń 6 aiynda 545 agroqurylymǵa 563 myń ga jaiylym jer, shóp shabýǵa 23 agroqurylymǵa 1,5 myń ga shabyndyq jer berildi. Osy oraida, oblystyń mal azyǵy jaǵdaiynda taldaý jasap, jaǵdaidyń turaqtylyǵyna kóz jetkizilgen. Biyl óńirdegi mal basyna qajetti 4 mln tonnaǵa jýyq mal azyǵyn tolyqtai daiyndaýǵa múmkindikter bar. Onyń ishinde 2,7 mln tonna jońyshqa, 134,6 myń tonna súrlem, 71 myń tonna pishendeme jáne 945 myń tonna tabiǵi shóp jinalady. Búgingi kúnge 3,2 mln tonna mal azyǵy jinalǵan. Aimaqta mal sharýashylyǵy salasy turaqty damýda. Sońǵy eki jyldyń ózinde mal basy men odan alynǵan ónim kólemi 10-15% artqan.
