Kentaýlyq Fýrqat Qaýynbaevtyń velosipedti janyna serik etkenine biyl 36 jyl bolypty. Osy jyldar ishinde ol 30 velosiped taqymdaǵan. Olardyń ekeýi ábden tozyǵy jetkenshe qyzmetine jarasa, 16-syn urlap ketken, dep habarlaidy QazAqparat.
Fýrqat Qaýynbaev Kentaý qalalyq sáýlet jáne qala qurylysy bóliminde bas maman qyzmetin atqarady. Qaladan 14 shaqyrym jerdegi Qarnaq aýylynda turatyn ol kúndelikti jumysyna velosipedpen baryp keledi. Qysy-jazy qos dóńgelekti kólikti janyna serik etken jigit aǵasy velosipedtin zaman talabyna sai sándep alǵan.
– Velosipedti qysy-jazy tebemin. Eger de qysta qar qalyń bolsa, jumysyma velosipedti jetelep jaiaý baryp kelemin. Bul bir jaǵynan maǵan úlken demalys. Buryndary aýyldan qalaǵa kelgenshe bir velosiped minetinmin. Al qalanyń ishindegi jumystaryma ekinshi velosipedimdi paidalanatynmyn. Qazir barlyǵyna bir velosipedpen baryp júrmin. Úidegi garajymda qosymsha úsh velosipedim tur, – deidi ol.
Buqaralyq sporttyń bul túri jigit aǵasynyń densaýlyǵyna kóp paidasyn tigizipti. Bozbala shaǵynda jeńil atletikamen shuǵyldanǵan Fýrqat joǵary oqý ornynda oqyp júrgende júgirýden eshkimge des bermegen. Qatarynyń aldy bolyp, institýttyń chempiony atanǵan. Tipti, respýblikalyq ýniversiadalarǵa da qatysqan. Úlken dárejege jetpese de, kishigirim saiystardyń aldy bolǵan. Áskerge barǵan kezinde de janyna serik bolǵan sporttan qol úzbegen. Tek qyzmetke ornalasqan soń, júgirýin siretipti.
– Shahtaǵa dispetcher bolyp jumysqa ornalastym. Bir jerde otyryp jumys istegen soń sportty qoiýǵa týra keldi. Biraz kún ótken soń júregim aýyryp tósek tartyp jatyp qaldym. Tekserildim. «Júregiń úlkeigen» degen diagnoz qoidy. Oǵan basty sebep – sportty tastap ketýim bolypty. Organizm ábden qalyptasyp qalǵannan keiin, sportty tastap ketýge bolmaidy eken. Júrek aýrýy boiynsha naýqas atanyp, esepke turdym. Aýrýhanadan shyqqan soń aýyldan qalaǵa júgirip baryp kelip júrdim. Aýyldastarym kúlip, kelemejdegen soń velosipedke kóshtim. Sonda da ákeme kelip: «Balańa qoi deseishi, uiat qoi, aqshasy joq bolsa, aqsha bereiik», degender de boldy. Alty jyl qatarynan velosipedpen júrgen soń dárigerler «júregiń qalypty» dep esepten shyǵardy. Halyq ta meni 15 jyl boiy sóz etti. Qazir úirendi, – deidi kentaýlyq veloshabandoz.
Fýrqat Zahitdinuly jumysyna 35 minýtta jetedi. Bólimge berilgen qyzmettik kólikti tek reidtik jumystarda, qurylys nysandaryn aralaǵanda nemese alys saparǵa shyqqanda ǵana paidalanady. Basshylardan da «velosipedińdi tasta, uiat bolady» degenderi de kezdesipti. Tipti, «Sen ózińe júktelgen jumysty emes, jeke isterińdi atqaryp júrsiń», dep urysqan kezderi de bolypty. Tek jaǵdaidy aityp túsindirgen soń, «joq» dei almapty.
- 1985 jyly bir jalaqyma «Týrist» dep atalatyn velosipedin satyp aldym. Sodan beri 36 jyl ótti. Bir velosipedim aptaǵa jetpei qoldy boldy. Keide aptasyna eki velosipedti urlattym. Al eń uzaǵyn 14 jyl mindim. Ramasynyń 8 jerinen jamalǵan edi. Aýylǵa ketip bara jatyp úsh jerinen synyp ketti. Men kópshiliginde ustalǵan velosipedti satyp alamyn. Osyǵan deiin 30 velosipedke minsem, sonyń úsheýi-aq jańa edi – deidi ol.
Fýrqat velosipedti joǵary talǵammen alady. Aqaýy baiqalsa, jóndep alý esh qiyndyq týdyrmaidy. Jaqsylap kútip minse, jemshóp, benzin suramaityn velosiped júrip-turýyna jarap tur.
– Jýyrda balam Almatydan 1987 jylǵy velosiped alyp kelip berdi. Jańasyn almaqshy bolyp edik, 300 myń teńge turady eken. Bizge qymbatqa tústi. Sodan bazardan 15 myń teńgege eskisin aldyq. Qalanyń adamdary da meni jaqsy tanidy. «Mende mynandai velosiped bar, alasyń ba?» – dep usynys jasaityndary da bar. Eger de unap jatsa, keri qaitarmaimyn, – deidi ol.
