2018 jyldyń 20 qarashasynda «BJZQ» AQ Túrkistan oblystyq filialynda «BJZQ barlyq salymshylarǵa qoljetimdi» atty ashyq esik kúnin ótkizbek. Atalmysh qor qyzmetkerleriniń aitýynsha, ol ádettegiden erekshe bolmaq.
Sharaǵa salymshylar jáne alýshylarmen qatar alǵash ret mektep oqýshylary men stýdentter de qatysady. Filial direktory S. Baidýanovtyń pikirinshe, qor halyqtyń qarjylyq mádenietin qalyptastyrýǵa úlken septigin tigizedi. Sondyqtan ashyq esik kúnine jas urpaqtyń tartylýy kezdeisoq emes. Bolashaqta joǵary synyp oqýshylary men stýdentter jinaqtaýshy zeinetaqy júiesine qatysa bastaidy. Al, olardyń zeinetaqylary qazirgidei memlekettik biýdjetten emes, ózderiniń aýdarǵan zeinetaqy jinaqtaryna tikelei bailanysty bolady.
– «BJZQ» qyzmetteriniń 80 paiyzy qazir qoljetimdi. Ol qashyqtyqtan elektrondyq túrde basqarylady. Sonyń arqasynda keńsege kelip, kezek kútpei-aq internet nemese uialy telefondardyń kez kelgen operatsiialyq júiesine beiimdelgen ENPF uialy qosymshasy arqyly qyzmet alýlaryna bolady. Bul salymshylar men alymshylarǵa ýaqytyn únemdeýge múmkindik beredi, – deidi filial direktory.
Qor ókilderiniń aitýynsha, qatysýshylar elektrondyq tásilmen mindetti jáne erikti zeinetaqy jarnalaryn esepteý jóninde, jeke zeinetaqy shotynyń jai-kúii týraly habarlama ala alady. Qor saitynda bolashaq jinaqtar men tólemderdiń shamalas mólsherin esepteýge arnalǵan zeinetaqy kalkýliatory da bar.
