Aqsaqal Turmaǵanbet Lahabaev «Áziret Sultan» memlekettik tarihi-mádeni qoryq-mýzeiine tarihi, dini-rýhani kitaptar men jazba eskertkishter tabys etti, dep habarlaidy QazAqparat.
Kúni búginge deiin kóne sandyqta oraýly jatqan muralardy kózdiń qarashyǵyndai saqtap kelgen qariia ǵasyr kórgen jádigerler ári qarai murajaida saqtalǵanyn jón sanapty.
«Ákem 3 jasymda qaitys bolǵan. Jetpisten asyp kóz jumǵan anam osy dúnielerdi amanattap ketti. Urpaqtan-urpaqqa jetken dúnieni kútip-saqtaǵanymyz bolmasa, ishindegi jazýlardyń máni, tarihi qundylyǵyna mán bermeppiz. Ǵasyrlar kórgen muralardy máńgilikke saqtaý úshin mýzeige tapsyrýdy uiǵardyq», - deidi Turmaǵanbet qariia.
Osy oraida «Áziret Sultan» qoryq-mýzeii direktorynyń mindetin atqarýshy Ersin Tájibaev 81 jastaǵy Turmaǵanbet Adambekulynyń tarihi qundylyqtarǵa jaýapkershilikpen qarap, mýzeige tapsyrýǵa niet etken bastamasyna alǵys aityp, mýzei qyzmetkerleri kitaptardy ári qarai kásibi turǵyda saqtaitynyna ýáde etti.
Qoryq-mýzeidiń qyzmetkeri Tolqyn Joldasov mýzei qoryna amanattaǵan eńbekterdi aýdaryp, zertteý jumystaryn júrgizdi.
«1878 jyly Sankt Peterbýrgte basylyp shyqqan gazet qatty zaqymdalyp, usaq bólikterge bólinip ketken. Bólikterde dini nysannyń (meshit nemese kesene) jekelegen bólikteri men arab tilindegi sózderdiń bólikteri baiqalady. Bul jádigerdiń mazmunyn anyqtaý úshin, tolyqtai qaita qalpyna keltirý jumystaryn júrgizý qajet», - deidi Tolqyn Joldasov.
Aýdarmashy mamandardyń aitýynsha, taǵy bir kitapta paiǵambarlardyń oqiǵalary, ártúrli dertpen aýyrǵan adamdarǵa shipa bolatyn duǵalar berilgen.
