Túrkistan oblystyq Densaýlyq saqtaý basqarmasyna Ystanbulda ornalasqan Editepe (Yeditepe) ýniversitettik gospitaliniń direktory Ahmet Zihni Ajik pen birqatar dárigerler keldi.
Mártebeli qonaqtardy basqarma basshysy Muqan Egizbaev qabyldap, eki jaqty kelissózder júrgizdi, dep habarlaidy QazAqparat tilshisi.
Kezdesý barysynda taraptar ortaq memorandým jasap, ekijaqty mańyzdy qujatqa qol qoidy. Endi keler jyldyń qańtar aiynan bastap Túrkistan oblysynyń dárigerleri Ystanbuldaǵy Editepe (Yeditepe) ýniversitettik gospitalinde tájiribe jinaqtap, biliktiligin arttyrady. Túrik meditsinalyq ýniversitetiniń bazasynda qurylǵan klinika Eýropadaǵy eń ozyq keshendi densaýlyq saqtaý oshaǵynyń biri sanalady.
Túrkistan oblysynyń Densaýlyq saqtaý basqarmasy men ýniversitet gospitali arasyndaǵy kelisimge sáikes, densaýlyq saqtaý salasynda eki jaqty aqparat almasý, meditsina mamandaryn daiarlaý jáne olardyń biliktiligin arttyrý josparlanýda.
Eske salaiyq, Editepe kópsalaly meditsinalyq ortalyǵy 15 beiindi ortalyqty qamtidy. Klinikanyń negizgi baǵyttary - onkologiia, onkogematologiia, neirohirýrgiia, ýrologiia, ginekologiia, nevrologiia salalary. Meditsina ortalyǵynyń dárigerleri eresekter men balalarǵa júrek, baýyr, búirek jáne súiek kemigin transplantatsiialaý boiynsha operatsiialar júrgizedi. Jyl saiyn 30 myńnan astam patsientke qyzmet kórsetetin «aqyldy aýrýhana» álemdegi alǵashqy mikrobqa qarsy aýrýhana bolyp otyr.
