Túrkistan oblystyq balalar aýrýhanasynyń jan saqtaý bólimine Túlkibas aýdanynan bir ailyq náreste aýyr halde jetkizilgen. Dárigerler sábidiń júreginiń týa bitken aqaýy men asqazan ishek joldary jáne óńeshtegi tesik jaryqtary baryn sanaýly ýaqyt ishinde anyqtady, dep habarlaidy "Ult aqparat".
Oblystyq qoǵamdyq densaýlyq basqarmasynyń málimetinshe, barlyq qaýip-qaterler men asqynýlar tarazyǵa salynǵan. Balanyń jasandy qan ainalym jaǵdaiynda júrek aqaýyn túzetý jáne diafragmanyń óńesh tesigine operatsiia jasaý sheshimi qabyldanǵan. Kardiohirýrgtar men neonataldy hirýrgterdiń bilikti quramy jasaǵan ota 4 saǵatqa sozyldy. Nátijesinde náresteniń beti beri qarap, ómirine tóngen qaýip seiildi. Dárigerler otanyń mundai kúrdeli túri óńirde alǵash ret jasalyp otyrǵanyn aitady. Al, Dúniejúzilik densaýlyq saqtaý uiymynyń málimeti boiynsha mundai operatsiialar naýqastardyń 20 paiyzynda kezdesedi. Alaida, náresteler men 3 aiǵa deiingi sábilerge birneshe kúrdeli ota jasaý joǵary mamandandyrylǵan diagnostikany jáne joǵary bilikti mamandardyń bolýyn talap etedi.
Aita keteiik, bir ailyq náreste Balyqty aýylynyń turǵyny Dana Áshirbektiń besinshi perzenti. Bóbegin qiyn jaǵdaida dárigerler qolyna tapsyrǵan kópbalaly ana abzal jandardyń biliktilikterine riza bolyp, alǵysyn jetkizdi.
«Ár naýqastyń janyna jebeý bolyp, qandai aýrýǵa bolmasyn qarsy turatyn dárigerlerge degen sheksiz alǵysymdy bildirgim keledi. Balamnyń aýrýyna arasha bola bilgen dárigerlerge jáne medbikelerge sheksiz rizashylyǵymdy aitamyn. Sizder bizge sheksiz baqyt syiladyńyzdar», - deidi Dana Áshirbek.
