Túrkiia Prezidentiniń bas keńesshisi Ialchyn Topchý Elbasy Nursultan Nazarbaevqa túbi bir elderdiń yntymaǵyn nyǵaitýǵa qosqan úlesi úshin alǵys bildirdi, dep habarlaidy QazAqparat.
«31 naýryzda TMYK-tyń beiresmi sammiti ótti. Biz onda túrki halyqtarynyń birligi jóninde másele kóterdik. Barlyq túrki tildes halyqtar jáne túrki álemi birlesip, óziniń yntymaqtastyǵyn nyǵaita túsýi tiis. Túrkistandaǵy sammitte qabyldanǵan sheshimderdiń mańyzy erekshe. Ol tek túrki tildes memleketter úshin ǵana emes, basqa óńirler úshin de óte eleýli», - dedi Túrkiia ókili «Túrkistan – túrki áleminiń rýhani astanasy» atty halyqaralyq beinekonferentsiiada.
Túrki áleminiń birlikte bolýy dál qazirgi kezeńde mańyzdy ekenin ataǵan Ialchyn Topchý Elbasynyń baýyrlas elderdiń berekesin uiytýdaǵy eńbegine airyqsha toqtaldy.
«Biz kúsh-jigerimizdi bir arnaǵa baǵyttai otyryp, túrki áleminiń ortaq biryńǵai álem bolǵanyn qalaimyz. Túrki keńesiniń qurmetti tóraǵasy, Elbasy Nursultan Nazarbaev túrki yntymaqtastyǵyn damytýda óte kóp jumysty júzege asyrdy. Sondyqtan onyń qajyrly eńbegi úshin alǵys bildirgim keledi. Túrki áleminiń aqsaqaly, qurmetti Nursultan Ábishuly Nazarbaev Túrkistandaǵy beiresmi sammitte birneshe bastama kótergen bolatyn. «Túrkistan túrki áleminiń rýhani astanasy bolsyn» degen izgi tilegin jetkizdi. Túrkistan qalasyn damytý arqyly biz ortaq qundylyqtarymyzdy jandandyryp, túrki áleminiń yntymaǵyn nyǵaita túsemiz. Túrki áleminiń birtektiligi óte mańyzdy. Elbasynyń qajyrly eńbeginiń, mándi bastamalarynyń arqasynda Uly dalanyń mańyzdy qundylyqtary qaita jańaryp, túlep jatyr», - dedi Túrkiia Prezidentiniń keńesshisi.
